ევროპარლამენტის დელეგაციის ხელმძღვანელმა ანა გომესმა საარჩევნო პროცესის დროს არსებულ ხარვეზებზე ისაუბრა, თუმცა აღნიშნა, რომ ზოგადად შექმნილი იყო პირობები, რათა საქართველოს მოსახლეობას გაეკეთებინა თავისი არჩევანი.
„საოლქო საარჩევნო კომისიებში ბევრი საჩივარი იქნა წარდგენილი, მაგრამ, აღმოჩნდა, რომ საკანონდებლო ჩარჩო არ იყო სრულყოფილი, რათა ყველა ეს სარჩელი შესაბამისად განხილულიყო. ზოგიერთ შემთხვევაში, დღის წესრიგში დადგა შედეგების გაუქმების საკითხი. დოკუმენტებში ასევე გამოვლინდა შეუსაბამობები, რამაც საარჩევნო ადმინისტრაციისადმი ნდობა შეამცირა”, - განაცხადა გომესმა.
მისივე თქმით, შეშფოთება გამოიწვია მიღებულმა ინფორმაციებმა, ამომრჩეველზე ზეწოლის ზოგიერთი შემთხვევის შესახებ.
კერძოდ, გომესის თქმით, საუბარი სოციალური დახმარების მოხსნის, სამსახურებიდან გათავისუფლების მუქარაზე, თუ ამომრჩეველი მხარს დაუჭერდა ოპოზიციის კანდიდატს.
“ჩვენთვის გასაგებია, რომ შესაძლოა, ბევრი ასეთი ბრალდება არ იყოს დასაბუთებული, თუმცა შეიძლება გარკვეული შიში ამის მხრივ არსებობს. ჩვენ გვსურს, რომ შესაბამისმა უწყებებმა ამ საკითხებს სათანადო ყურადღება დაუთმონ და უზრუნველყონ, რომ მსგავსი მუქარა მომავალში არ განხორციელდეს”, - აღნიშნა გომესმა.
რაც შეეხება, უშუალოდ საარჩევნო პროცესებს, ანა გომესის თქმით, საარჩევნო კომისიებში პროცესი პროცედურების დაცვით მიმდინარეობდა და მუშაობდნენ კომისიის გამოცდილი წევრები, აქტივობა არ იყო მაღალი, შესაბამისად ხმის მიცემის პროცესი მშვიდ გარემოში წარიმართა.
