სპორტისა და ახალგაზრდობის საქმეთა სამინისტროსა და შინაგან საქმეთა სამინისტროს მხარდაჭერით ახალგაზრდებმა საგზაო უსაფრთხოების დაცვასთან დაკავშირებით საინფორმაციო კამპანია დაიწყეს.
სპორტის უნივერსიტეტის მიმდებარედ არსებულ უშუქნიშნო „ზებრა" გადასასვლელზე გაიმართა ფლეშმობი სლოგანით „გამატარე". ფლეშმობში მონაწილეობა სტუდია „მოდერნის" მოცეკვავეებმა და მოხალისეებმა მიიღეს. პირველი ღონისძიების ფარგლებში საქართველოს ფიზიკური აღზრდისა და სპორტის სახელმწიფო სასწავლო უნივერსიტეტში მოკლემეტრაჟიანი ფილმის ჩვენება გაიმართა. ასევე, საგზაო უსაფრთხოების საკითხებში ექსპერტის პრეზენტაცია, შემდეგ კი საჯარო განხილვა. დარიგდა ქართულ ენაზე გადათარგმნილი ბესტსელერი საგზაო უსაფრთხობის თემაზე.
საინფორმაციო კამპანიას ორგანიზებას უწევს საქართველოს ახალგაზრდობის წარმომადგენელი გაეროში თათია დოლიძე. აღნიშნული მანდატი სპორტისა და ახალგაზრდობის საქმეთა სამინისტრომ „ახალგაზრული პოლიტიკის განვითარების პროგრამის" ფარგლებში, გაეროს მიერ მიღებული რეზოლუციის საფუძველზე მიენიჭა. საინფორმაციო კამპანიის მიზანია საზოგადოების ცნობიერების ამაღლება საგზაო წესების დაცვასთან დაკავშირებით.
