სექტემბერში რუსეთის შეიარაღებული ძალების დანაკარგმა, დაღუპულთა და დაჭრილთა სახით, 50 000-ს გადააჭარბა. იტყობინება Bloomberg-ი ნატოს მაღალჩინოსანზე დაყრდნობით.
როგორც იუწყებიან, უშუალოდ დაღუპულთა რაოდენობა 28 000-ს შეადგენს, რაც მნიშვნელოვნად აღემატება უკრაინის შეიარაღებული ძალების დანაკარგებს.
ალიანსის ცნობით, იმავე პერიოდში უკრაინის შეიარაღებულმა ძალებმა 5 000 სამხედრო დაკარგეს.
Bloomberg-ის წყაროს ცნობით, რუსი სამხედროები აგრძელებენ შეტევას და ჯარისკაცებს გზავნიან ისეთ „საცეცხლე ზონებში“, რომლებიც გაჯერებულია მოწინააღმდეგის მოიერიშე დრონებით, ნაღმებით და მოქცეულია საარტილერიო ცეცხლის ქვეშ.
აგვისტოში, The Guardian-მა გამოაქვეყნა ინფორმაცია, რომ რუსეთი ყოველთვიურად საბრძოლო მოქმედებებში 6000-ით მეტ სამხედრო კარგავდა, ვიდრე ჯარისკაცების რაოდენობას ზრდიდა.
წლის დასაწყისში რუსული დანაკარგების შეფასებები უფრო დაბალი იყო. აპრილში NATO-ს გენერალურმა მდივანმა, მარკ რუტემ განაცხადა, რომ ცალკეულ თვეებში რუსეთი დაღუპულებისა და მძიმედ დაჭრილების სახით 30-35 ათას სამხედროს კარგავდა.
აგვისტოს ბოლოსთვის NATO-ს პროგნოზები გაიზარდა. ალიანსის გენერალური მდივნის მოადგილემ, რადმილა შეკერინსკამ აღნიშნა, რომ NATO-ს ანალიზის მიხედვით, რუსეთის შეიარაღებული ძალები ამჟამად ყოველთვიურად 40 ათასზე მეტ ადამიანს კარგავენ.
ამავდროულად, გამოცემა რუსეთის სამხედრო დანახარჯების შესახებაც წერს. მათი ცნობით, წელს მოსკოვის სამხედრო ხარჯები, სავარაუდოდ, 17 ტრილიონ რუბლს (178 მილიარდ ევროს) მიაღწევს, რაც დაახლოებით 40%-ით მეტია რუსეთის ხელისუფლების მიერ 2025 წლის ბოლოს გამოცხადებულ საწყის მაჩვენებლებზე.
