ევროპაში ნატო-ს გაერთიანებული ძალების უმაღლესი მთავარსარდლის, ალექსუს გრინკევიჩის განცხადებით, ევროპამ უკრაინის მხარდაჭერა უნდა გააძლიეროს, რათა რუსეთის ჰიბრიდულ თავდასხმებს უპასუხოს.
გრინკევიჩმა ამის შესახებ ვარშავის უსაფრთხოების ფორუმზე Bloomberg-თან საუბრისას განაცხადა.
რუსული აგრესიის ახალი ტალღის გაძლიერებაზე საუბრისას, რომელიც ნატო-ს საჰაერო სივრცის დარღვევას, ცეცხლის გაჩენის შემთხვევებს, დივერსიებსა და კიბერშეტევებს მოიცავს, გრინკევიჩმა აღნიშნა: „ისინი ჩვენი საერთო ნების გატეხვას ცდილობენ“.
მან მაგალითად დანია და გერმანია მოიყვანა, რომლებმაც საკუთარ ტერიტორიებზე ჰიბრიდული თავდასხმების შემდეგ უკრაინისთვის დახმარება გაზარდეს.
„ეს სათანადო საპასუხო ზომებია, რომლებიც რუსეთს აჩვენებს, რომ მიზნები, რომელთა მიღწევასაც ის ცდილობს, მიუღწეველია“, - განაცხადა ალექსუს გრინკევიჩმა.
Bloomberg-ის ცნობით, ეს თავდასხმები იმ ფონზე ხდება, როდესაც რუსეთის პრეზიდენტის, ვლადიმირ პუტინის, ჯარები უკრაინაში კვლავ მნიშვნელოვან დანაკარგებს განიცდიან. ამასთან, გამოცემის თანახმად, უკრაინა რუსეთის საოკუპაციო ძალებს სულ უფრო დიდ ეკონომიკურ ზიანს აყენებს - რუსეთის სიღრმეში მდებარე ნავთობგადამამუშავებელ ქარხნებსა და მონაცემთა ცენტრებზე დარტყმებით.
როგორც გამოცემა აღნიშნავს, ნატო, როგორც წესი, მსგავს ინციდენტებზე რეაგირების უფლებას კვლავ ცალკეულ ქვეყნებს უტოვებს. გასულ თვეში გერმანიამ პირველად ოფიციალურად დაადანაშაულა რუსეთი ლაიფციგის აეროპორტში ასაფეთქებელი მოწყობილობით აღჭურვილი დრონის გამოყენებით თავდასხმის მცდელობაში.
„მე, რა თქმა უნდა, არ მეშინია, რომ ამაში პასუხისმგებლობა რუსეთს დავაკისრო. თუ რომელიმე ქვეყანა ამას ჩემგან მოითხოვს, სიამოვნებით ვისაუბრებ ამაზე“, - აღნიშნა გრინკევიჩმა.
გამოცემა აღნიშნავს, რომ ევროპაში ძლიერდებიან პოლიტიკური ძალები, რომლებიც უკრაინის შემდგომი მხარდაჭერის წინააღმდეგ გამოდიან, 2027 წელს კი გადამწყვეტი არჩევნები გაიმართება. მიუხედავად ამისა, გრინკევიჩი დარწმუნებულია, რომ ამ ძალების ყურადღებას უკრაინის „ცენტრალური როლი“ მიიპყრობს, რომელიც მას ევროპის უსაფრთხოების უზრუნველყოფაში აკისრია.
„ვფიქრობ, მათთვის ძალიან მალე სრულიად ნათელი გახდება, კონკრეტულად რა უნდა გააკეთონ და რატომ არის ეს აუცილებელი მათი საკუთარი ეროვნული უსაფრთხოებისთვის“.
Bloomberg-ის განმარტებით, გრინკევიჩი პოლონეთში იმყოფება, რათა წარადგინოს გეგმები იმის შესახებ, თუ როგორ შეიძლება რუსეთის სწრაფად დამარცხება იმ შემთხვევაში, თუ ის ნატო-ს ტერიტორიაზე შეიჭრება.
გრინკევიჩის თქმით, „გამარჯვების თეორიის“ გამოქვეყნების მიზანი რუსეთის შეკავებაა - მოსკოვისთვის იმის ჩვენება, თუ რა მოხდება, თუ ის ნატო-ს ტერიტორიას დაიკავებს.
მისივე განცხადებით, დრონები და ხელოვნური ინტელექტის ტექნოლოგიები ამ სტრატეგიის განუყოფელი ნაწილია. მათი მთავარი დანიშნულებაა იმ უპირატესობების კიდევ უფრო გაძლიერება, რომლებიც ნატო-ს რუსეთთან შედარებით უკვე აქვს, მაგალითად, F-35 ტიპის გამანადგურებლების სახით.
კითხვაზე, ხომ არ უშლის ამ ძალისხმევას ხელს აშშ-ის პრეზიდენტ დონალდ ტრამპსა და ვლადიმირ პუტინს შორის მიღწეული შეთანხმება რუსეთიდან აშშ-ში დიზელის საწვავის იმპორტის შესახებ, გრინკევიჩმა უპასუხა, რომ მისი ყურადღება მხოლოდ სამხედრო საკითხებზეა კონცენტრირებული.
„შესაძლებლობების ფანჯრები ჩნდება და ქრება. ჩვენ უნდა ვეძებოთ ეს შესაძლებლობები და გამოვიყენოთ ისინი, როდესაც ასეთი ფანჯარა გაიხსნება“, - განაცხადა მან.
