ევროკომისიის ანგარიში ძალიან გაბრაზებული ადამიანის მიერ დაწერილ დოკუმენტს ჰგავს, რომელმაც ბევრი იჩხიკინა და ბევრი იწვალა, მაგრამ მაინც ვერ გააკეთა ის, რაც უნდოდა, – მის შესახებ პარლამენტის ევროინტეგრაციის კომოტეტის თავმჯდომარემ, ლევან მახაშვილმა განაცხადა.
„ამიტომ, ამ დოკუმენტს ჩვენთვის დამატებითი, ახალი ღირებულება არ აქვს. რაც შეეხება მეთოდოლოგიას, დოკუმენტი მომზადებულია ცალმხრივად, ერთი მხარის მიერ. არანაირი კომუნიკაცია არ იყო საქართველოსთან, სამინისტროებთან, ექსპერტებთან, ანუ ის, რაც ნორმალურ პირობებში, იგივე სხვა კანდიდატ ქვეყნებთან შემთხვევაში ხდებოდა, საქართველოსთან მიმართებაში არ იყო. შესაბამისად, ანგარიში ვერ იქნება დაბალანსებული და ობიექტური. ეს არის ცალმხრივად, ბრიუსელის ფანჯრებიდან თუ ოთახებიდან, ხუთი-ექვსი ადამიანის მიერ დაწერილი ანგარიში, სადაც საქართველოს არანაირი ხედვა არ არის წარმოდგენილი. რაც შეეხება შინაარსს, რა თქმა უნდა, აქ ბევრი აბსურდული განცხადებაა. კარგ მაგალითად რად ღირს – „თვითნებურად დაკავებული ადამიანების“ მოხსენიება. საზოგადოებამ კარგად დაინახა, რომ ასეთი ტიპის ადამიანებს, ასეთი დანაშაულის ჩამდენ ადამიანებს, ევროპაში მკვლელობის ბრალდებით ასამართლებენ, საქართველოში კი, „თვითნებურად დაკავებულ პირებს“ უწოდებენ და საქართველოს ხელისუფლებას მათ გათავისუფლებას სთხოვენ“, – განაცხადა ლევან მახაშვილმა.
მისი თქმით, მკაფიოა ორმაგი სტანდარტი.
„ჩვენ მზად ვართ, დიალოგის რეჟიმში თუნდაც იმ ფორმატებს დავუბრუნდეთ, რაც მნიშვნელოვანია, რომ ასეთი ტიპის ანგარიშები იყოს ობიექტური, დაბალანსებული და ექსპერტების დონეზე მომზადებული. რაც მთავარია, პოლიტიკურ დონეზე, დიალოგი აღვადგინოთ. თუ ბრიუსელს რაიმე კითხვა აქვს კონკრეტულ კანონებსა და სახელმწიფოს მიერ გადადგმულ ნაბიჯებზე, ყველაფერზე გავცემთ ამომწურავ პასუხს დეტალურად, სიღრმისეულად და არა, ასე ზერელედ და გუგლის გამოყენებით“, – განაცხადა ლევან მახაშვილმა.
შეგახსენებთ, რომ ევროკომისიის ანგარიშში, რომელიც დღეს უნდა გამოქვეყნდეს სხვა საკითხებთან ერთად ნათქვამია: „პრეზიდენტმა შეიწყალა რამდენიმე პირი, რომლებიც საქართველოში აქციებთან დაკავშირებით უკანონოდ იყვნენ დაკავებული და დანაშაული აღიარეს, მიუხედავად ამისა, ბევრი სხვა პირი პატიმრობაში რჩება“.
