შინაგან საქმეთა სამინისტროს საინფორმაციო-ანალიტიკური დეპარტამენტი გასული თვის მდგომარეობით, საქართველოს სახელმწიფო საზღვარზე გადაადგილებულ ვიზიტორთა სტატისტიკურ მონაცემებს აქვეყნებს. 

სტატისტიკური მონაცემების თანახმად, მიმდინარე წლის ივლისი 764 022 ვიზიტით განისაზღვრა, რაც გასული წლის ანალოგიური პერიოდის მაჩვენებელზე 3.5 %-ით მეტია.

რაც შეეხება იანვარ-ივლისის ინტერვალს, შსს-ს ინფორმაციით, ქვეყანაში უკვე 3 400 335 ვიზიტი განხორციელდა, რაც გასული წლის ანალოგიური საანგარიშო პერიოდის მაჩვენებელზე, 10.6%-ით მეტია.

ამასთან, შემოღებული პირობითი დაყოფის მიხედვით, მიმდინარე წლის იანვარ-ივლისში ხვედრითი წილის ურთიერთმიმართება შემდეგია:

ა) ტურისტი - 1 401 914 ვიზიტი (საერთო რაოდენობის 41,2%, მატება წინა წლის ანალოგიურ მაჩვენებელთან 17,5%);

ბ) ტრანზიტი - 672 317 ვიზიტი (საერთო რაოდენობის 19,8%, კლება წინა წლის ანალოგიურ მაჩვენებელთან -6,6%);

გ) სხვა - 1 326 104 ვიზიტი (საერთო რაოდენობის 39%, მატება წინა წლის ანალოგიურ მაჩვენებელთან 14,3%).

2016 წლის ივლისშიც ყველაზე მეტი ვიზიტი კვლავ აზერბაიჯანიდან (+4,4%), სომხეთიდან (-7,4%), თურქეთიდან (-7,9%), რუსეთიდან (-2,7%) და უკრაინიდან (+18,4%) განხორციელდა. ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-ივლისშიც გამოირჩნენ ლატვია, იტალია, ლიტვა და საფრანგეთი (შესაბამისად 25%, 16%, 7% და 7%), შუა აზიის ქვეყნებიდან - ყაზახეთი (35%). აღმოსავლეთ ევროპის ქვეყნებიდან - ბელორუსია (30%), ახლო აღმოსავლეთიდან - ისრაელი (69%), ხოლო აზიის ქვეყნებიდან - არაბათა გაერთიანებული საემიროები 33%-იანი მატებით. 

აქვე აღსანიშნავია ამერიკის შეერთებული შტატების მოქალაქეების 8%-იანი ზრდა. 

როგორც შსს-ში განმარტავენ, საერთო ვიზიტორების დაბალი პროცენტით მატება სასაზღვრო-გამშვებ პუნქტ „ყაზბეგის“ დროებითი შეფერხებითაა განპირობებული.