იუსტიციის მინისტრი თეა წულუკიანი მოითხოვს საკონსტიტუციო სასამართლომ კითხვებზე დაუყოვნებლივ უპასუხოს. როგორც მან ჟურნალისტებტან განაცხადა, საკონსტიტუციო სასამართლო საქმეების განხილვასთან დაკავშირებით რიგითობის პრინციპს არღვევს.
„საკონსტიტუციო სასამართლოსთან დაკავშირებით, ვსვამ პროცედურულ კითხვებს, მაინტერესებს ამ კითხვებზე პასუხი და ამ პასუხებმა უნდა აჩვენოს, არის თუ არა საკონსტიტუციო სასამართლო, მისი თავმჯდომარე და პირველი კოლეგია პოლიტიკური თამაშის ინსტრუმენტი, არის თუ არა ეს ინსტიტუტი ამის გამო „ნაციონალური მოძრაობის“ სამსახურში. დავსვი შემდეგი კითხვები და ვიმეორებ - ჩემი გადასახედიდან ირღვევა რიგითობის პრინციპი. რატომ ირღვევა? ჩვენ თუ ავიღებთ მაგალითად „რუსთავი 2”-ის შვიდ საკონსტიტუციო სარჩელს, შვიდივე განიხილა პირველმა კოლეგიამ. რიგითობა ირღვევა. ეს ნიშნავს იმას, რომ პრობლემა შეიძლება ჰქონდეს ასეთი მიკუთვნების დროს საქმის ობიექტურდ გადაწყვეტას და პრობლემა შეიძლება ჰქონდეს მთლიანად საკონსტიტუციო სასამართლოს მიკერძოებულობის მხრივ”, - განაცხადა წულუკიანმა.
მისივე თქმით, რიგითი მოქალაქეების 2013, 2014,2015 წლიდან ელოდებიან საჩივრის განხილვას ან პასუხს მიიღებას.
“ეს ხდება მაშინ, როდესაც მაგალითად „რუსთავი2“-ის სარჩელს 6-7 დღეში იხილავს საკონსტიტუციო სასამართლოს პირველი კოლეგია და რამდენიმე დღეში აჩერებს ხოლმე ამა თუ იმ კანონმდებლობას. ასევე, მაქვს კითხვები არსებით განხილვასთან დაკავშირებით, როდესაც მაგალითად ამა თუ იმ სარჩელის ავტორი არის ბატონი უგულავა, მაშინ განხილვა მაქსიმუმ სამ-ოთხ თვეში ხდება. ჩვენ გვქონდა შემთხვევა, როდესაც საკონსტიტუციო სასამართლომ ერთ დღეში გადაწყვიტა ე.წ. კაბელების საქმეზე მის წინაშე დაყენებული საკითხი, ერთ დღეში მოამზადა მომხსენებელმა პროექტი, ერთ დღეში იქნა ეს დამტკიცებული, ეს ძალიან კარგია. სწრაფი მართლმსაჯულება კარგია.თუმცა, მაქვს კითხვა - რატომ იჩაგრებიან სხვები?”, - განაცხადა თეა წულუკიანმა.
იუსტიციის მინისტრს კითხვები აქვს საკონსტიტუციო სასამართლოს პოლიტიკასთან დაკავშირებით.
„რა პოლიტიკას ახორციელებს საკონსტიტუციო სასამართლო, როდესაც ყველა საქმეზე საკამრისია ავტორი იყოს "ნაციონალური მოძრაობა" ან პოლიტიკურად სენსიტიური საქმე, „რუსთავი 2“ , კომპანია შპს "საქართველო”, მაშინვე იხილავს სარჩელს. ეს ის ხალხია, რომლებიც არიან ბატონი გვარამიას პოლიტიკური ოჯახის წევრები - მაია კოპალეიშვილი, ვლადიმერ ვარძელაშვილი. რატომ არ იხილავს ამას სხვა კოლეგია? რატომ არ არის განსხვავებები მოსამართლეებს შორის? ამას ითვალისწინებს რიგითობის დაცვა, ამას ითვალისწინებს პირველი იანვრიდან სავალდებულო წესი, რომელიც ჩვენ პარლამენტში შევიტანეთ, რომელზეც ვენეციის კომისიამ ორი დღის წინ საბოლოოდ დადებითი დასკვნა დადო და, რომლის საფუძველზეც 1 იანვრიდან ჩვენი საკონსტიტუციო სასამართლო ვალდებული იქნება, ელექტრონული წესით გაანაწილოს საქმეები და ველი ამ კითხვებზე პასუხს, რაც შეიძლება სწრაფად”, - განაცხადა თეა წულუკიანმა.
