თუ ვინმეს შეცდომა მოუვიდა, ეს ბიძინა ივანიშვილია, - აცხადებს გაზეთ "პრემიერისთვის" მიცემულ ინტერვიუში ექსპერტი სოსო ცისკარიშვილი. მისი თქმით, ივანიშვილმა თავად მოუყვა საქართველოს ტელემაყურებელს, როგორ გაუცრუვდა მას იმედები და სულ სხვა ხასიათის ადამიანი აღმოჩნდა გიორგი მარგველაშვილი, ვიდრე მას ეგონა.
"ვფიქრობ, თუ ვინმეს შეცდომა მოუვიდა, ეს ბიძინა ივანიშვილია. ის ამ შეცდომას აღიარებს და ამიტომ შეცდომის გამოსწორება მისი ფუნქცია აღარ არის და რეალობას უნდა შევეგუოთ. როგორც კი ამ შეცდომის გამოსწორების მცდელობას დავიწყებთ, ცხადია, უკვე კონსტიტუციური სივრციდან გამოვდივართ და ქვეყანას უფრო დიდი საფრთხის წინაშე ვაყენებთ. ვფიქრობ, ვინც ეს პროცესი წამოიწყო, მანვე უნდა დაასრულოს ის და ყოველგვარი აურზაურის გარეშე მალე ასეც მოხდება", - აცხადებს ცისკარიშვილი და არნიშნავს, რომ პრობლემა ბიძინა ივანიშვილის მოსაგვარებელია, რადგან ხალხის მიერ არჩეული პრეზიდენტის მიმართ ასეთი ნეგატივიზმის ინიცირება სწორედ ბიძინა ივანიშვილის ნოუ-ჰაუ გახლავთ.
