თბილისში, მოსკოვის გამზირის დასაწყისში უსახლკარო პირებისთვის გახსნილი თავშესაფარი ფინანსთა მინისტრის მოადგილემ, გიორგი ჯავახიშვილმა და ფინანსთა სამინისტროს მომსახურების სააგენტოს გენერალურმა დირექტორმა, ზურაბ ახალკაციშვილმა მოინახულეს. მათ თავშესაფარში მყოფი ადამიანებისთვის ფინანსთა სამინისტროს სისტემის თანამშრომლების მიერ შეძენილი, ასევე მათი ოჯახებიდან შემოწირულობის სახით შეგროვილი საკვები პროდუქტები, თბილი ტანსაცმელი, ფეხსაცმელი და ჰიგიენური საშუალებები მიუტანეს. დღესვე უსახლკარო პირებისთვის გახსნილი თავშესაფარისთვის ფინანსთა სამინისტროს მომსახურების სააგენტომ სხვადასხვა სახის ინვენტარი მიიტანა.
„თავშესაფარს ორი სახის დახმარება გავუწიეთ. ფინანსთა სამინისტროს მომსახურების სააგენტომ გამოყო ის ინვენტარი, რაც გამოადგებათ როგორც მომსახურე პერსონალს, ისე იმ ადამიანებს, რომლებიც ღამეს ათევენ დასახლებაში. გარდა ამისა, ფინანსთა სამინისტროს სისტემის თანამშრომლებმა საკუთარი სურვილით შემოწირულობის სახით შეაგროვეს პროდუქტები და ტანსაცმელი, რათა თავშესაფარში მყოფი ადამიანები უზრუნველყოფილები იყვნენ პირველადი მოხმარების ნივთებით. ჩვენ მივესალმებით ამგვარ სოციალურ პროექტებს და ყველას მოვუწოდებთ დახმარება გაუწიონ ამ ადამიანებს," - განაცხადა ფინანსთა მინისტრის მოადგილემ, გიორგი ჯავახიშვილმა.
10 დეკემბერს, პრემიერ-მინისტრმა ირაკლი ღარიბაშვილმა ამინდის გაუარესებისა და ტემპერატურის მკვეთრი ვარდნის გამო უწყებათშორისი სამუშაო ჯგუფი შექმნა და მას მიუსაფარი მოქალაქეებისთვის გადაუდებელი პრობლემების სასწრაფოდ მოგვარება დაავალა. ჯგუფს საქართველოს რეგიონული განვითარებისა და ინფრასტრუქტურის მინისტრი დავით ნარმანია ხელმძღვანელობს.
ჯგუფის შემადგენლობაში შედიან ფინანსთა, ეკონომიკისა და მდგრადი განვითარების, ენერგეტიკის, შრომის, ჯანმრთელობისა და სოციალური დაცვის, თავდაცვისა და შინაგან საქმეთა სამინისტროების ხელმძღვანელები.
