უკრაინის უმაღლესი რადას დეპუტატებმა მხარი დაუჭირეს უკრაინული დელეგაციის დაბრუნებას ევროპის საბჭოს საპარლამენტო ასამბლეაზე.
გადაწყვეტილებას მხარი 348-მა დეპუტატმა დაუჭირა, 14-მა თავი შეიკავა, წინააღმდეგ არავინ წასულა.
საპარლამენტო ასამბლეის უახლოესი სესია სტრასბურგში 27 იანვარს გაიხსნება და 31 იანვრამდე გასტანს.
გასული წლის სექტემბერში უკრაინულმა დელეგაციამ უარი თქვა ევროსაბჭოს საპარლამენტო ასამბლეის შემოდგომის სხდომაზე მონაწილეობაზე, ორგანიზაციაში რუსეთის დელეგაციის დაბრუნების გამო.
შეგახსენებთ, 2014 წელს რუსეთის მიერ უკრაინის ნახევარკუნძულის, ყირიმის მიტაცებისა და ანექსიის შემდეგ, მოსკოვის დელეგაციას ევროსაბჭოს საპარლამენტო ასამბლეაში ხმის უფლება ჩამოერთვა. ამის საპასუხოდ მოსკოვმა ჯერ დელეგაციის მუშაობა შეაჩერა ასამბლეაში, ოდნავ მოგვიანებით კი საწევროს გადახდაზე თქვა უარი.
გასული წლის ივნისში, ევროსაბჭოს საპარლამენტო ასამბლეამ, სრულად აღუდგინა რუსეთის დელეგაციას ხმის უფლება, რასაც მკაცრად ეწინააღმდეგებოდნენ უკრაინის, საქართველოს, დიდი ბრიტანეთისა და კიდევ რამდენიმე ქვეყნის დელეგაციები.