ლიეტუვის თავდაცვის მინისტრმა რობერტას კაუნასმა განაცხადა, რომ ქვეყნის ტერიტორიაზე შეჭრილ დრონს, წინასწარი მონაცემებით, ასაფეთქებელი მოწყობილობით არ იყო აღჭურვილი.
კაუნასის თქმით, დრონი ლიეტუვის ტერიტორიაზე ბელარუსიდან შევიდა, თუმცა ამ ეტაპზე უცნობია, კონკრეტულად რა ტიპის უპილოტო აპარატი იყო.
მინისტრის განცხადებით, დრონის ჩამომგდებმა გამანადგურებელმა არა მხოლოდ ლიეტუვის, არამედ ნატო-ს საჰაერო სივრცეც დაიცვა.
„ამ ინციდენტმა აჩვენა, რომ შეგვიძლია კოორდინირებულად, როგორც ერთიანმა გუნდმა ვიმოქმედოთ, დროულად ვრეაგირებდეთ, საჭირო გადაწყვეტილებები მივიღოთ და გავანეიტრალოთ ობიექტები, რომლებიც ლიეტუვის ტერიტორიაზე შეიჭრებიან, რითაც ჩვენი მოქალაქეების უსაფრთხოებას უზრუნველვყოფთ“, – განაცხადა კაუნასმა.
მისი თქმით, ამ დროისთვის დრონის ნამსხვრევები შეგროვებულია და ტერიტორიის დამატებითი მონაკვეთების დათვალიერება გრძელდება. მიმდინარეობს გამოძიებაც, რომლის მიზანია უპილოტო აპარატის მარშრუტის დადგენა.
კაუნასის განცხადებით, ამის შემდეგ შესაძლებელი გახდება იმის შეფასება, იყო თუ არა დრონი რუსული და წარმოადგენდა თუ არა ინციდენტი შესაძლო პროვოკაციას, ან სხვა ქვეყნის, მათ შორის თავდაცვითი დანიშნულების დრონი იყო.
„წინასწარი მონაცემებით, დრონს ასაფეთქებელი მოწყობილობა არ ჰქონდა, თუმცა წინასწარი ინფორმაციაა და ამჟამად ზუსტდება. დაველოდოთ, ვიდრე ინფორმაცია დაზუსტდება. ტერიტორიის უფრო ფართო მონაკვეთის შემწომება მიმდინარეობს და როდესაც სრული სურათი გვექნება, ყველაფრის თქმა შეგვეძლება“, - აღნიშნა მინისტრმა.
კაუნასმა ასევე გააფრთხილა, რომ უკრაინაში მიმდინარე ომი, მიუხედავად იმისა, რომ შესაძლოა შორეულ კონფლიქტად ჩანდეს, რეგიონზე უკვე აისახება.
„რუსეთს მშვიდობა არ სურს, ის სამშვიდობო მოლაპარაკებების მაგიდასთან არ ჯდება, პუტინს მშვიდობა არ სურს. თუ მშვიდობას ვერ მივაღწევთ და რუსეთს სამშვიდობო მოლაპარაკებების დაწყებას ვერ ვაიძულებთ, სამწუხაროდ, ბალტიის რეგიონში მსგავსი ინციდენტები შესაძლოა გახშირდეს“, - განაცხადა ლიტვის თავდაცვის მინისტრმა.
შეგახსენებთ, რომ 15 სექტემბრის ღამეს ნატოს საპატრულო მისიის გამანადგურებელმა ლიეტუვის თავზე, ქვეყნის საჰაერო სივრცეში შესული უცნობი დრონი ჩამოაგდეს.
