"საქართველოს გზის" ლიდერი სალომე ზურაბიშვილი ქართულ სატელევიზიო სივრცეში რუსულენოვანი არხის "პირველი კავკასიის" გახსნას "აშკარა საფრთხის შემქმნელად" აფასებს.
"ეს რუსეთის პროვოცირებას ნიშნავს საკუთარ ტერიტორიაზე. რუსულენოვანი ტელევიზიის ამუშავება კავკასიის რესპუბლიკების სამაუწყებლოდ და მათზე რუსეთის ბატონობის წინააღმდეგ საქადაგებლად, ისეთივე უპასუხისმგებლო ქმედებაა, როგორც საქართველოს მთავრობის ყველა განცხადება/დეკლარაცია", - ნათქვამია "საქართველოს გზის" ლიდერის განცხადებაში.
ამასთან, სალომე ზურაბიშვილის აზრით, "ეს ახალი "ჯვაროსნული კამპანია" რუსეთს საშუალებას მისცემს ნებისმიერი აგრესია/რეპრესია ლეგიტიმური ფორმით, ტერორიზმის წინააღმდეგ ბრძოლის სახელით აწარმოოს".
"ბრალდებები, რომელიც მოსკოვიდან პანკისის ხეობის და დღესტანში საქართველოს საიდუმლო სამსახურების მიერ მოწყობილი აფეთქებების თაობაზე გაისმის, ამის აშკარა მომასწავებელია", - აღნიშნავს ზურაბიშვილი.
