"ევროპული საქართველოს" წევრი გიგი უგულავა არ იზიარებს სააკაშვილის განცხადების პათოსს პლებისციტთან დაკავშირებით.
როგორც გიგი უგულავა ტელეკომპანია "მთავარის" ეთერში აცხადებს, "პლებისციტის იდეის ივანიშვილის პროექტად გამოცხადება მიუღებელია".
"არ ვიზიარებ მიხეილ სააკაშვილის პათოსს, ვთვლი, რომ სანამ მოლაპარაკებები არ დაწყებულა, მანამდე დამუნათება და მით უმეტეს, პლებისციტის იდეის ივანიშვილის პროექტად გამოცხადება, აბსოლუტურად მიუღებელია, რადგან პლებისციტს ბევრი პლუსი აქვს. ხვალ რომ რიგგარეშე არჩევნები ჩატარდეს, კანონის მიხედვით, რიგგარეშე არჩევნები ჩატარდება 120/30-ზე პრინციპით, ანუ 30 მაჟორიტარი, თუ რამე არის ივანიშვილის, მინდა, მიხელ სააკაშვილს შევახსენო, ეს სწორედ 30 მაჟორიტარია...
ყველას აქვს თავის პირადი აზრი, მაგრამ მეგობრულად მინდა ვთხოვო მათ, „ნაციონალურ მოძრაობას“ პოლიტსაბჭოს კენჭი აქვს ნაყრელი და მიღებული აქვს, რომ იდეაში შეიძლება განიხილოს 2021 წლის განმავლობაში პლებისციტის იდეა. უადგილოდ მიმაჩნია ახლა პლებისციტზე საუბარი. პრინციპულად ვერ მივიღებ იმ პოზიციას, რომ პლებისციტი ბიძინას იდეაა, არანაირი ბიძინას იდეა არ არის, თუ რამე არის ბიძინას იდეა, ეს არის შეინარჩუნოს რაც შეიძლება დიდი ხანი ეს მავნებლური სისტემა, რომელიც თავის თავში მაჟორიტარებს გულისხმობს", - განაცხადა გიგი უგულავამ.
შეგახსენებთ, რომ დღეს საქართველოს ყოფილმა პრეზიდენტმა მიხეილ სააკაშვილმა გაავრცელა განცხადება იმასთან დაკავშირებით, რომ, მისი აზრით, ოპოზიცია პლებისციტს არავითარ შემთხვევაში არ უნდა დათანხმდეს.
პლებისციტთან დაკავშირებით სააკაშვილის განცხადებას გამოეხმაურნენ ასევე ელენე ხოშტარია, "ევროპული საქართველოს" წევრი გიგა ბოკერია, "ნაციონალური მოძრაობის" წევრები სალომე სამადაშვილი და რომან გოცირიძე, "სტრატეგია აღმაშენებლის წევრი სერგო ჩიხლაძე და სხვები.
