აშშ-ის პრეზიდენტ დონალდ ტრამპის ადმინისტრაცია მოითხოვს, რომ უკრაინაში ომის დასრულების შესახებ მოლაპარაკებების მომდევნო რაუნდში ევროპის ქვეყნები უშუალოდ ჩაერთონ.
აშშ-ის პრეზიდენტის წარმომადგენლებმა, ჯარედ კუშნერმა და სტივ უიტკოფმა, რუსეთი უნდა დაარწმუნონ, რომ ევროპას მოლაპარაკებებში მონაწილეობის უფლება მისცეს. ვაშინგტონს სურს, რომ ამ კვირაში აბუ-დაბიში დაგეგმილი შეხვედრები ბოლო აღმოჩნდეს, რომლებშიც ევროპული ქვეყნები სრულფასოვნად არ მონაწილეობენ. ამის შესახებ Politico ანონიმურ ამერიკელ მაღალჩინოსნებზე დაყრდნობით წერს.
კუშნერი და უიტკოფი, რომლებიც თებერვლის შემდეგ უკრაინას, რუსეთსა და აშშ-ს შორის პირველი სამმხრივი მოლაპარაკებების შუამავლები არიან, სამომავლო შეხვედრებში ევროპელების მონაწილეობის საკითხის წამოჭრას გეგმავენ.
ამერიკული მხარე მოლაპარაკებების პროცესის დაჩქარებას ცდილობს და იმედოვნებს, რომ მომდევნო რაუნდი უკვე ევროპის სრულფასოვანი მონაწილეობით გაიმართება.
„ჩვენ გვჭირდება ევროპა მოლაპარაკებების მაგიდასთან“, - განაცხადა ერთ-ერთმა ამერიკელმა მაღალჩინოსანმა.
მისი თქმით, ვაშინგტონი ევროპული ქვეყნების ჩართვას მიმდინარე სამმხრივი მოლაპარაკებების დასრულებისთანავე სთავაზობს.
ამერიკელმა წარმომადგენლებმა დადებითად შეაფასეს ევროპელი ლიდერების პირდაპირი კონტაქტებიც ვლადიმირ პუტინთან. კერძოდ, 27 ოქტომბერს ფინეთისა და ნორვეგიის ლიდერები რუსეთის პრეზიდენტს ტელეფონით ესაუბრნენ და უფრო აქტიური ურთიერთქმედების აუცილებლობას გაუსვეს ხაზი.
