გერმანიის კანცლერი ფრიდრიხ მერცი აცხადებს, რომ ის დაბლოკავს ევროკავშირის მომდევნო შვიდწლიან ბიუჯეტს, თუ ბლოკის ყველა წევრი სახელმწიფო არ აიღებს ვალდებულებას, უკრაინას 2027 წელს და შემდგომში ფინანსური დახმარება გაუწიონ
ამის შესახებ Financial Times იუწყება.
ევროპული საბჭოს პრეზიდენტის, ანტონიო კოშტასადმი გაგზავნილ წერილში მერცმა განაცხადა, რომ გერმანიის მხარდაჭერა ევროკავშირის 2028-2034 წლების ბიუჯეტისადმი დამოკიდებული იქნება იმაზე, დათანხმდება თუ არა ბლოკის ყველა წევრი ქვეყანა უკრაინის დაფინანსებას. მომავალი წლისთვის უკრაინას 70 მილიარდი ევროს დაფინანსების დეფიციტი აქვს.
„უკრაინის ფინანსური დეფიციტის დასაფარად თითოეული ჩვენგანის, გამონაკლისის გარეშე, სამართლიანი წვლილის შეტანის საერთო ვალდებულება აუცილებელი პირობაა ამ საკითხის გადასაწყვეტად და ყველა სხვა საკითხის, განსაკუთრებით კი ფინანსური შედეგების მქონე საკითხების განსახილველად“, - აცხადებს მერცი.
გერმანია ევროკავშირის ბიუჯეტის ყველაზე დიდი კონტრიბუტორია, ბიუჯეტის მოლაპარაკებების დროს გერმანიის ფინანსური გავლენის გამოყენებით კი, მერცი ცდილობს კიევისთვის დაფინანსების უზრუნველყოფას როგორც მომავალ წელს, ასევე შემდგომში.
