"სტრატეგია აღმაშენებლის" პოლიტსაბჭოს წევრი სერგო ჩიხლაძე "დღის კურიერის" ეთერში აცხადებს, რომ წარმოდგენა არ აქვს რატომ გააკეთა საქართველოს მესამე პრეზიდენტმა მიხეილ სააკაშვილმა პლებისციტთან დაკავშირებით განსხვავებული განცხადება, როდესაც მან თქვა, რომ ოპოზიცია პლებისციტს არ უნდა დათანხმდეს.
სერგო ჩიხლაძე ამბობს, რომ მოლაპარაკებების მაგიდასთან ყველა ბარიერგადალახული ოპოზიციური პარტია პლებისციტის მომხრე იყო, როგორც ერთ-ერთი კომპრომისის.
მისივე თქმით, მათ შორის იყო "ნაციონალური მოძრაობაც" და ამას ყველა ოპოზიციური კოლეგა დაადასტურებს.
"ყველანი შეთანხმდით მოლაპარაკების მაგიდასთან, რომ პლებისციტი შეიძლება იყოს ერთ-ერთი კომპრომისი. რაც შეეხება თვითონ "ნაციონალური მოძრაობის" პოზიციასაც, ისინიც იყვნენ იმათ რიგებში, ვინც ეს წინადადება გაიზიარა ჯერ კიდევ ნოემბერ-დეკემბერში.
არ ვიცი დღეს რატომ ეწინააღმდეგება მიხეილ სააკაშვილი. სააკაშვილი არ არის ჩემი პარტიის თავმჯდომარე, ამიტომ მე არ ვიცი რა დგას ამის უკან.
პარტნიორები ვართ ყველანი მსხვილი ოპოზიციური პარტიისაც და მცირესაც, მთავარი არის, რომ ყველა პარტია შეთანხმებული ვართ იმ 6 პუნქტზე; ყველა პარტიას თავის დროზე არაოფიციალური ხელმოწერით დადასტურებული აქვს, რომ ერთ-ერთი საკითხი შეიძლება იყოს პლებისციტი, როდესაც მეოთხე რაუნდზე მივდიოდით და ეს ფასილიტატორ ელჩებთანაც დადასტურებულია. ყველა პარტიაში იგულისხმება ბარიერგადალახული პარტიები, ჩამოგითვლით: "ნაციონალური მოძრაობა", "სტრატეგია აღმაშენებელი", "ლელო", "ლეიბორისტული პარტია" და "გირჩიც".
დიახ, პლებისციტი შეიძლება იყოს ერთ-ერთი კომპრომისი, თუმცა კიდევ ერთხელ ვამბობ, კიდევ ერთი საკითხია, რომ ხელისუფლებიდან რა წინადადება წამოვა. ჩვენ ხომ არ ვიცით, ხომ შეიძლება ხელისუფლებისგან მოვიდეს აბსოლუტურად სხვა მსგავსი წინადადება, რომელზეც შეიძლება ასევე დავფიქრდეთ ხომ, ვადამდელთან დაკავშირებით?
დიახ, ეს ყველამ იცის, ამას ყველა ჩემი ოპოზიციური კოლეგა დაადასტურებს. ეს ასე არ იყო ნამდვილად, გეუბნებით პლებისციტის იდეაზე", - განაცხადა სერგო ჩიხლაძემ.
შეგახსენებთ, რომ დღეს საქართველოს ყოფილმა პრეზიდენტმა მიხეილ სააკაშვილმა გაავრცელა განცხადება იმასთან დაკავშირებით, რომ, მისი აზრით, ოპოზიცია პლებისციტს არავითარ შემთხვევაში არ უნდა დათანხმდეს.
