თბილისში ვიზიტით მყოფმა ლიტვის სეიმის თავმჯდომარე ირინა დეგუტიენემ ვილნიუსის სკვერი მოინახულა.
როგორც მან სკვერის დათვალიერების შემდეგ ჟურნალისტებს განუცხადა, ქართველი ერი მამაცი ერია, რითაც ლიტველები მოხიბლულნი არიან.
"მოხარული ვარ, რომ საქართველოში ვიმყოფები. ბედნიერი ვარ, რომ ვნახე ვილნიუსის სკვერი. ნამდვილად მამაცი ხალხი ხართ. უამრავი ტკივილი გადაიტანეთ. ბევრჯერ დაგიმარცხებიათ ძლიერი მტერი. თქვენი ქვეყანა დღესაც ერთიანია და წინ მიდის. მოხიბლული ვართ იმით, რასაც მიაღწიეთ და რაც გააკეთეთ", - განაცხადა ლიტველმა სტუმარმა.
შეგახსენებთ, რომ ირინა დეგუტიენე ორდღიანი სამუშაო ვიზიტით საქართველოში დღეს ჩამოვიდა. ის დღესვე ქუთაისს ეწვევა, სადაც საქართველოს პრეზიდენტ
მიხეილ სააკაშვილს შეხვდება.
ვიზიტის ფარგლებში ლიტველი მაღალჩინოსანი ქართველ კოლეგა - დავით ბაქრაძესთანაც გამართავს შეხვედრას. შეხვედრის შემდეგ ბაქარაძე და დეგუტიენე ერთობლივ ბრიფინგსაც გამართავენ.
აღნიშნულის გარდა ლიტვის სეიმის თავმჯდომარე სამების საკათედრო ტაძარს და ბავშვთა მენტალური ჯანმრთელობის ცენტრსაც მოინახულებს.
