„საქსტატის" წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2013 წლის III კვარტალში 239 მლნ. აშშ დოლარი შეადგინა, რაც ამავე წლის II კვარტალის მაჩვენებელს 3 პროცენტით, ხოლო 2012 წლის III კვარტალის მაჩვენებელს 20 პროცენტითაღემატება.
წინასწარი მონაცემებით, 2013 წლის III კვარტალში საქართველოში პირდაპირი უცხოური ინვესტიციების შემომავალმა ნაკადებმა 551 მლნ. აშშ დოლარი შეადგინა.
საანგარიშო პერიოდში ქვეყანაში განხორციელებული ინვესტიციებიდან, პირველ ადგილზე საერთაშორისო ორგანიზაციები იმყოფება 20 პროცენტით, მეორეზე აშშ - 15 პროცენტით, მესამე და მეოთხე ადგილს ნიდერლანდები და თურქეთი ინაწილებენ 13-13 პროცენტით.
როგორც „საქსტატში" განმარტავენ, უმსხვილესი სექტორების წილმა (განხორციელებული პირდაპირი უცხოური ინვესტიციების მიხედვით) 2013 წლის III კვარტალში 81 პროცენტი შეადგინა. ყველაზე მეტი პირდაპირი უცხოური ინვესტიცია საფინანსო სექტორში განხორციელდა და 48 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 20 პროცენტია. მეორე ადგილზე იმყოფება ტრანსპორტი და კავშირგაბმულობა 47 მლნ. აშშ დოლარით, ხოლო მესამეზე ენერგეტიკა - 33 მლნ. აშშ დოლარით.
