ოკუპირებულ აფხაზეთში ერთი წლის წინ გაუჩინარებული რუსი ბიზნესმენი, „ელ პეტროლეუმ აბხაზია"-ს ხელმძღვანელი სერგეი კლემანტოვიჩი მკვდარი იპოვეს. ინფორმაცია ამის შესახებ აფხაზეთის ე.წ. გენერალურმა პროკურატურამ გაავრცელა.
მათივე ინფორმაციით, ბიზნესმები მოკლულია. მკვლელებმა იგი სოფელ ადიუბჟაში მდებარე ჭაში ჩააგდეს. ასევე მოკლულია ვინმე ოკსანა სკარედნოვა, რომლის გვამიც ასევე ჭაში იქნა აღმოჩენილი.
აღნიშნულ საქმეზე დაკავებულია მკლელობაში ეჭვმიტანილი ოთხი ადამიანი: რამინ ხმაილი, ახრა გოპია, ჯუმბერ ბიგვავა და ასლან ცვიჟბა. მიმდინარეობს გამოძიება.
1966 წელს დაბადებული ბიზნესმენი და 1985 წელს დაბადებული მისი მეგობარი ქალი სოხუმიდან 2012 წლის 10 სექტემბერს გაუჩინარდნენ.
აფხაზური მხარის ინფორმაციით, ამჟამად ე.წ. სამართალდამცავები აღნიშნული დანაშაულის შემკვეთის ვინაობის დადგენას ცდილობენ.
საინტერესოა, რომ სოხუმში ახლახანს მოკლული დიპლომატის დიმიტრი ვიშერნევის საქმის გამოძიებისას, დიპლომატის მკვლელობის შესაძლო ვერსიების განხილვის დროს ერთ ერთი ვერსია სწორედ დაკარგულ ბიზნესმენს სერგეი კლემანტოვიჩს უკავშირდებოდა.
„შესაძლოა სოხუმში ახლახანს მომხდარი მკვლელობა, შარშან, „ელ პეტროლეუმ აბხაზია"-ს ხელმძღვანელის, ბიზნესმენ სერგეი კლემანტოვიჩის გაუჩინარებასთან იყოს კავშირში.
რამდენიმე ხნის განმავლობაში კლემანტოვიჩი ბელორუსში ბიზნესით იყო დაკავებული. 2004 წელს კი ის დააკავეს ქრთამის აღების გამო და მალევე გამოუშვეს. ამის შემდებ ბიზნესმენმა თავისი ბიზნესის ოკუპირებულ აფხაზეთში გადატანა გადაწყვიტა.
აფხაზეთში ის შავი და ფერადი ლითონების ჯართის შესყიდვითა და დამუშავებით იყო დაკავებული. გასული წლის შემოდგომაზე კი ის გაუჩინარდა მეგობარ გოგონასთან ერთად. „შესაძლოა ვიშერნევი კლემატოვიჩის არაოფიციალურ ძებნას ახორციელებდა", _ წერდა აფხაზური პრესა.
