რუსეთის ქალაქ რიაზანში მდებარე ნავთობგადამამუშავებელ ქარხანაში ხანძარი გაჩნდა. ამის შესახებ უკრაინული მედია Telegram-არხებზე დაყრდნობით წერს. გავრცელებული ინფორმაციით, საწარმოზე დრონებით იერიში განხორციელდა.
როგორც გამოცემა Astra წერს, რიაზანის ნავთობგადამამუშავებელი ქარხანა რუსული საოკუპაციო არმიას საავიაციო საწვავსა და დიზელს აწვდის.
გამოცემის ცნობით, ადგილობრივი დროით ღამის დაახლოებით 2 საათზე რიაზანსა და რეგიონში უპილოტო საფრენი აპარატების საფრთხე გამოცხადდა. ამის შემდეგ ადგილობრივმა მცხოვრებლებმა აფეთქებების ხმა, საჰაერო თავდაცვის სისტემების მუშაობა და დრონების ხმაური დააფიქსირეს.
ამასთან, Telegram-არხმა Supernova+ რიაზანის ნავთობგადამამუშავებელ ქარხანაში გაჩენილი ხანძრის ამსახველი ვიდეო გაავრცელა. Astra-ს OSINT-ანალიტიკოსის შეფასებით, ვიდეოში სწორედ ეს საწარმო ჩანს.
რიაზანის ნავთობგადამამუშავებელი ქარხანა რუსეთის ერთ-ერთი უმსხვილესი ნავთობგადამამუშავებელი საწარმოა და კომპანია „როსნეფტის“ შემადგენლობაში შედის.
ღია წყაროების მონაცემებით, ნავთობგადამამუშავებელი ქარხანა ქალაქ რიაზანის სამხრეთ სამრეწველო ზონაში მდებარეობს. მისი წლიური წარმადობა დაახლოებით 17-18 მილიონი ტონა ნავთობია.
ქარხანა აწარმოებს საავტომობილო ბენზინს, დიზელს, საავიაციო ბენზინს, მაზუთსა და ბიტუმს. საწარმო საწვავით ამარაგებს მოსკოვსა და რუსეთის ცენტრალურ რეგიონებს, ასევე აწარმოებს საწვავს რუსეთის თავდაცვის სამინისტროს საჭიროებისთვის.
