საქართველოს სავაჭრო-სამრეწველო პალატის პრეზიდენტი კახა ბაინდურაშვილი სამუშაო ვიზიტით ლისაბონში იმყოფება, სადაც18-19 აპრილს მონაწილეობს ევროკომისიის მიერ აღმოსავლეთ პარტნიორობის პროგრამის ფარგლებში მიმდინარე საერთაშორისო კონფერენციაში.
ევროკომისიასთან ერთად, კონფერენციის ორგანიზატორია განათლების ევროპული ფონდი, რომლის მიზანია აღმოსავლეთ პარტნიორობის პროგრამაში მონაწილე ქვეყნებში პროფესიული განათლების რეფორმირების პროცესის მხარდაჭერა.
კონფერენციაზე განიხილება გარდამავალი ეკონომიკისა და განვითარებად ქვეყნებში პროფესიული განათლების ხელშეწყობისთვის ისეთი მნიშვნელოვანი საკითხები როგორიცაა შრომითი ბაზრის კვლევა, დამსაქმებელსა და სამუშაო მაძიებელთა შორის სწორი კომუნიკაციის ჩამოყალიბება, როგორია ამ კუთხით ევროკავშირის ქვეყნებში არსებული მიდგომები და სხვა. კონფერენციაში მონაწილე ქვეყნების წარმომადგენლებს ექნებათ შესაძლებლობა ერთმანეთს გაუზიარონ გამოცდილება და მათივე ქვეყნებში დანერგილი პრაქტიკა.
კონფერენციაზე სიტყვით გამოსვლისას, საქართველოს სავაჭრო-სამრეწველო პალატის პრეზიდენტი ისაუბრებს პროფესიული განათლების ხელშეწყობის კუთხით საქართველოში არსებულ მდგომარეობაზე და იმ ღონისძიებებზე, რომელსაც სავაჭრო-სამრეწველო პალატა საქართველოს პროფესიული განათლების ფონდთან ერთად გეგმავს ქვეყანაში პროფესიული განათლების განვითარებისთვის.
