ეკონომიკისა და მდგრადი განვითარების მინისტრი გიორგი კვირიკაშვილი სამუშო ვიზიტით ვაშინგტონში იმყოფება. გიორგი კვირიკაშვილი მონაწილეობას იღებს მსოფლიო ბანკისა და სავალუტო ფონდის მიერ გამართულ ყოველწლიურ შეხვედრაში.
მინისტრმა შეხვედრა გამართა მსოფლიო ბანკის კერძო და ფინანსური სექტორის განვითარების მმართველ ჯგუფთან. მოლაპარაკებების მთავარ თემებს კონკურენტუნარიანობა და მისი ინსტიტუციური დახმარება, ექსპორტის ხელშეწყობა, საფინანსო ბაზრის განვითარება, კერძო და საშუალო ბიზნესისა და მეწარმეობის განვითარება და საპენსიო რეფორმა წარმოადგენდა.
ვიზიტის ფარგლებში გიორგი კვირიკაშვილი ასევე შეხვდება გავლენიან სარეიტიონგო სააგენტოების Standart&Poor's-ისა და Moody's-ის ხელმძღვანელობას, რომლებიც საერთაშორისო სუვერენულ საკრედიტო რეიტინგთან დაკავშირებით ანალიტიკურ კვლევას ეწევიან. ასევე, საქართველოს ფინანსთა მინისტრ ნოდარ ხადურთან ერთად მოლაპარაკებებს გამართავს მსოფლიო ბანკის აღმასრულებელ დირექტორ ფრენკ ჰემსკერკთან და ევროპისა და ცენტრალური აზიის ვიცე-პრეზიდენტ ფილიპ ლე უროსთან. შეხვედრები ასევე გაიმართება ევროპის საინვესტიციო ბანკის(EIB) ხელმძღვანელობასთან. ეკონომიკისა და მდგრადი განვითარების მინისტრი სხვადასხვა ქვეყნების დელეგაციებთანაც გამართავს შეხვედრებს, რომლებიც მიმდინარე ყოველწლიურ შეხვედრაში მონაწილეობენ, კერძოდ სტენლი ფიშერთან, რომელიც ისრაელის ბანკის მმართველია.
