მიმდინარე სეზონზე შავი ზღვის ე.წ. აფხაზურ აკვატორიაში 21,5 ათასი ტონა ქაფშიაა დაჭერილი. ინფორმაციას ამის შესახებ აფხაზეთის ე.წ. სოფლის მეურნეობის სამინისტრო ავრცელებს. მათივე ინფორმაციით, გასულ წელს ეს მაჩვენებელი 40 ათას ტონას აღემატებოდა, რომლიდანაც 6 ათასი ტონა საექსპორტოდ იქნა გამოყენებული. მიმდინარე წელს კი აფხაზეთიდან ქაფშიის ექსპორტი არ იგეგმება.
ეკოლოგიისა და ბუნებრივი რესურსების დაცვის ე.წ. კომიტეტის თავმჯდომარე რომან დბარი გასულ წელთან შედარებით, მიმდინარე წელს ქაფშიის ასეთი ნაკლები რაოდენობის დაჭერას თბილი ზამთრით ხსნის.
"ქაფშია მიგრირებადი თევზია.მიმდინარე წელს კი ძალიან თბილი ზამთრის გამო აფხაზურ აკვატორიაში თევზები ძალიან გვიან შემოვიდნენ ამიტომაც დაჭერილი თევზის რაოდენობა ნაკლებია", _ აცხადებს დბარი.
