საქართველოსა და მსოფლიო ბანკს შორის თანამშრომლობის საკითხები განიხილეს ფინანსთა მინისტრმა ნოდარ ხადურმა და მსოფლიო ბანკის რეგიონულმა დირექტორმა საქართველოში ჰენრი კერალმა.
ფინანსთა სამინისტროში გამართულ შეხვედრაზე მხარეებმა იმსჯელეს მსოფლიო ბანკის მიმდინარე და სამომავლო პროექტებზე საქართველოში.
„ჩვენთვის ძალიან მნიშვნელოვანია საერთაშორისო საფინანო ორგანიზაციებთან, განსაკუთრებით, მსოფლიო ბანკთან ურთიერთობა. დღევანდელ შეხვედრაზე ვისაუბრეთ სამომავლო თანამშრომლობაზე, იგეგმება მნიშვნელოვანი პროექტები რომელიც ითვალისწინებს ინფრასტრუქტურის განვითარებას და ზოგადად, ქვეყნის ეკონომიკის წინსვლას," - განაცხადა ფინანსთა მინისტრმა. მისი თქმით, მსოფლიო ბანკის მხრიდან გამოთქმულია მზადყოფნა შემუშავდეს ახალი სტრატეგია საქართველოსთვის, რომელიც მოიცავს მთავრობის ახალ პრიორიტეტებს სოციალურ, ჯანდაცვისა და ინფრასტრუქტურულ მიმართულებებს.
„მსოფლიო ბანკის წარმომადგენლებს პერიოდული შეხვედრები გვაქვს ფინანსთა სამინისტროში, ჩვენთვის მნიშვნელოვანია ფინანსთა მინისტრთან ერთად განვიხილოთ საქართველოსა და მსოფლიო ბანკს შორის მომავალი თანამშრომლობის სტრატეგია. იმედი გვაქვს, ძალიან მალე შევთანხმდებით იმ ძირითად ჩარჩო პირობებზე, რომლითაც მსოფლიო ბანკი და საქართველო გააგრძელებენ წარმატებულ პარტნიორობას მომავალ წლებში," - განაცხადა მსოფლიო ბანკის რეგიონულმა დირექტორმა საქართველოში ჰენრი კერალმა.
