ახალი ხელისუფლება ცდილობს, რომ ბიუჯეტი პოლიტიკას მოარგოს და არა პირიქით, პოლიტიკა მოარგოს ბიუჯეტს. ამის შესახებ განცხადება ექსპერტმა ეკონომიკურ საკითხებში ლევან კალანდაძემ სააგენტო „ჯი-ეიჩ-ენთან" საუბრისას, ახალი პროგრამის მსოფლიო ბანკის სესხის დაწყების კომენტირებისას გააკეთა.
ლევან კალანდაძე ფინანსთა მინისტრის განცხადებას, იმის თაობაზე, რომ საქართველომ მსოფლიო ბანკს ახალი სესხის გამოყოფაზე თხოვნით უკვე მიმართა, უცნაურს უწოდებს და განმარტავს, რომ ბიუჯეტის მიღებისას ფინანსთა სამინისტრო სულ სხვაგვარ განცხადებებს აკეთებდა.
„ფინანსთა მინისტრის განცხადება საერთაშორისო დონორი ორგანიზაციებიდან სოფლის მეურნეობის პროექტების დასაფინანსებლად სესხის აღების თაობაზე არის ცოტა უცნაური. უცნაურია იმიტომ, რომ ბიუჯეტის კანონის განხილვის დროს და თვითონ ბიუჯეტის მიღების შემდეგ, ფინანსთა სამინისტრომ ცალსახად განაცხადა რომ ხელისუფლება აღარ აპირებს ახალი სესხების, ახალი ვალდებულებების აღებას საერთაშორისო ბაზარზე იმისთვის, რომ მან განახორციელოს ესა თუ ის სახელმწიფო პროგრამა. ამის ერთ-ერთ საფუძვლად კი მოყვანილი იქნა ის გარემოება, რომ საბიუჯეტო შემოსავლები ქვეყანაში ჯანსაღი ეკონომიკური პოლიტიკის განხორციელებისათვის სრულიად საკმარისი იყო და მაშინ დამატებითი ვალდებულებების აღება მოხსენიებულ იქნა წინა ხელისუფლების არარაციონალურ და არაეფექტურ საბიუჯეტო პოლიტიკის განხორციელებასთან. აქედან გამომდინარე ეს ურთიერთგამომრიცხავი განცხადებები და ქმედებები რაც გუშინ გაჟღერდა ბევრ კითხვის ნიშანს ბადებს", - განმარტავს ლევან კალანდაძე.
ექსპერტი მიიჩნევს, რომ თავად სესხის გამოყოფასთან დაკავშირებით საკმაოდ ბევრი კითხვებია და ამ ეტაპზე ძნელია მის ეკონომიკურ ეფექტზე საუბარი.
"ახალი ხელისუფლება ცდილობს, რომ ბიუჯეტი პოლიტიკას მოარგოს და არა პირიქით პოლიტიკა მოარგოს ბიუჯეტს., რაც თავისთავად არარაციონალურია. ამ კონკრეტულ ფაქტთან დაკავშირებით ბევრი კითხვის ნიშანია, თუ რა სესხი იქნება ეს, კონკრეტულად რა მოცულობის, და რა საპროცენტო განაკვეთით იქნება აღებული. ამ საკითხების გარკვევის შემდეგ შეგვიძლია ვისაუბროთ სესხის ტექნიკურ-ეკონომიკურ საკითხზე.
რაც შეიძლება პოლიტიკურ ნაწილს. ცოტა უხერხულია დაპირებების გაცემა, შემდგომ ადამიანების ჯიბიდან ამოღებული თანხებით დაფარო. ბუნებრივია ამას ყველა მარტივად გააკეთებდა და ამაში ვერანაირ გმირობას და ვერანაირ პროგრესულობას მე პირადად ვერ ვხედავ"- აცხადებს ლევან კალანდაძე.
შეგახსენებთ, რომ 21 იანვარს ცნობილი გახდა, რომ საქართველოს მთავრობა მსოფლიო ბანკისგან მორიგი სესხის აღებას ელოდება. თუმცა როგორც ირკვევა, წინასაარჩევნო დაპირებების შესასრულებლად მთავრობა ახალ სესხს იღებს. ფინანსთა მინისტრის განმარტებით სესხი საკმაოდ დაბალპროცენტიანი იქნება და ის სოფლის მეურნეობის დარგს მოხმარდება.
„მსოფლიო ბანკთან ინტენსიურად ვმუშაობთ სოფლის მეურნეობის დაფინანსების მიმართულებით. ფინანსთა სამინისტრომ წერილი უკვე მიწერა მსოფლიო ბანკს, იმასთან დაკავშირებით რომ საირიგაციო-სადრენაჟო სამუშაოების დასაფინანსებლად იაფი კრედიტი მივიღოთ, რათა სოფლის მეურნეობაში აღებული ვალდებულებები შევასრულოთ"- აცხადებს ნოდარ ხადური.
