ამერიკის შეერთებული შტატების პრეზიდენტმა, ბარაკ ობამამ ინაუგურაციის საზეიმო ცერემონიალში მიიღო მონაწილეობა. პრეზიდენტის ფიცის მიღების სანახავად, კაპიტოლიუმის წინ, ნაციონალურ ხეივანში ნახევარ მილიონზე მეტი ადამიანი შეიკრიბა. პრეზიდენტმა ორ ბიბლიაზე ერთდროულად დაიფიცა, რომელთაგან ერთი ადამიანის უფლებათა დამცველს, მარტინ ლუთერ კინგს ეკუთვნოდა, ხოლო მეორეზე 1861 წელს აბრაამ ლინკოლმა დაიფიცა.
პრეზიდენტმა, ფიცის მიღების შემდეგ, თავის ოცწუთიან სიტყვაში, დემოკრატიისა და სახელმწიფოს ინტერესების დაცვის გარდა, ქალთა და სექსუალური უმცირესობების საკითხზეც გააკეთა აქცენტი და განაცხადა, რომ დაიცავს მათ უფლებებს და შეეცდება კლიმატის შეცვლას.
პრესამ, ინაუგურაციაზე, პრეზიდენტის ოჯახის ვიზუალურ მხარეზეც გაამახვილა ყურადღება. ამერიკული მედიის ცნობით, აშშ-ის პირველ ლედის, მიშელ ობამას ახალი ვარცხნილობა ჰქონდა, ხოლო ტანთ ტომ ბრაუნის მუქი ლურჯი პალტო ემოსა. უფროსი ქალიშვილი მალია J.Crew-ის მარკის პალტოში იყო გამოწყობილი, ხოლო უმცროსს, საშას ახალგაზრდა დიზაინერის Kate Spade-ის პალტო ეცვა.
2009 წელს, ობამას ინაუგურაციაზე 160 მილიონი დოლარი დაიხარჯა, რაც აშშ-ის ისტორიაში ყველაზე ძვირადღირებულ ცერემონიად იქცა. ამ თანხის მესამედი სპონსორებმა გაიღეს. რა თანხა დაჯდა ობამას მეორე ინაუგურაცია, ჯერჯერობით, ცნობილი არ არის.
