"სახალხო კრების" ინფორმაციით, დღეს, 18 მაისს, კახეთის გზატკეცილზე სამმა მანქანამ გზა გადაუკეტა „სახალხო კრების" კახეთის რეგიონალური ორგანიზაციის ხელმძღვანელს ჯემალ ბაღათრიშვილს, „სახალხო კრების" ახალგაზრდული მოძრაობის რეგიონალური ორგანიზაციის ხელმძღვანელს დათო ჯორჯაძეს და კრების აქტივისტებს ნიკო ბაღათრიშვილს და ხვიჩა ურჩუხიშვილს. შავფორმიანმა ნიღბიანებმა ცეცხლი გაუხსნეს მათ მანქანას, ძალის გამოყენებით გადმოიყვანეს ისინი, ხელ-ფეხი შეუკრეს, სასტიკად სცემეს და გზის განაპირას მინდორში დაყარეს. ამჟამად კრების ოთხი წარმომადგენელი საგარეჯოს საავადმყოფოში იმყოფება.
"ხელისუფლებამ იცის, რომ 21 მაისს შეკრებილ ადამიანთა სამართლიან მოთხოვნას და ძალას წინ ვერაფერი აღუდგება, ამიტომ „სახალხო კრების" მიერ 21 მაისს დაგეგმილ აქციამდე სამი დღით ადრე ხელისუფლება პირდაპირ ფიზიკურ ანგარიშწორებაზე გადავიდა. ხელისუფლების წარმომადგენლებში მოსალოდნელი დასასრულის მოახლოების შიშმა იმ ზღვარს მიაღწია, როცა სააკაშვილის დანმაშავე რეჟიმმა საკუთარ ხალხთან ურთიერთობის უკვე კრიმინალური მექანიზმები აამუშავა", _ ნათქვაია მოძრაობის მიერ გავრცელებულ განცხადებაში.
"სახალხო კრებაში" დარწმუნებულები არიან, რომ ისეთ დაკვეთებს, როგორიც დღეს „სახალხო კრების" წარმომადგენელების წინააღმდეგ განხორციელდა, პოლიციის თანამშრომლების უმეტესობა არ ასრულებს. სააკაშვილის დანმაშავე ხელისუფლებას ზონდერბრიგადები იცავს.
„მიუხედავად იმისა, რომ სასტიკად გაგვისწორდენენ, ჩვენ უკანდახევას არ ვაპირებთ. ახლა უფრო მეტი თავდადებით ვიბრძოლებთ და კიდევ უფრო მეტი ადამიანი შემოგვიერთდება. ჩვენ ბოლომდე ვიბრძოლებთ და მიზანს მივაღწევთ", - განაცხადა კახეთის რეგიონალური ორგანიზაციის ხელმძღვანელმა ჯემალ ბაღათრიშვილმა.
ყოველდღე, ყოველი მოქმედებით სააკაშვილის ხელისუფლება დასასრულს უახლოვდება. სააკაშვილი და მისი გარემოცვა აგონიაშია. ხელისუფლების ვერანაირი მოქმედება ვერ შეუშლის ხელს 21 მაისს დაგეგმილ აქციას. 21 მაისს დაიწყება ამ დამნაშავე ხელისუფლების დასასრულისთვის გადამწყვეტი ბრძოლა, რომელიც გამარჯვებით დასრულდება.
