ბომბის საფრთხის შესახებ შეტყობინების გამო, თელ-ავივიდან ვენაში მიმავალი Austrian Airlines-ის თვითმფრინავი ბულგარეთის დედაქალაქ სოფიაში ავარიულად დაეშვა.
როგორც The Jerusalem Post იუწყება, Airbus A320-ის ეკიპაჟმა ბომბის საფრთხის შესახებ შეტყობინება რუმინეთის საზღვართან მიიღო, რის შემდეგაც თვითმფრინავი სოფიის აეროპორტში გადამისამართდა.
ბულგარეთის ხელისუფლების ინფორმაციით, ბორტზე 51 მგზავრი და ეკიპაჟის ექვსი წევრი იმყოფებოდა. ბულგარეთის საჰაერო ძალების გამანადგურებელი აფრინდა და მას სოფიის აეროპორტამდე გაჰყვა.
დაშვების შემდეგ მგზავრები თვითმფრინავიდან ჩამოვიდნენ, ხოლო ბორტზე უსაფრთხოების შემოწმება დაიწყო. ავიაკომპანიის ცნობით, მგზავრებს ალტერნატიულ რეისებზე გადაანაწილებენ.
ინციდენტის გარემოებებს შესაბამისი უწყებები იძიებენ. ამ დროისთვის ბორტზე ასაფეთქებელი მოწყობილობის არსებობა დადასტურებული არ არის.
