საფრანგეთის პრეზიდენტმა ემანუელ მაკრონმა განაცხადა, რომ პირები, რომლებმაც საპროტესტო აქციების დროს სამთავრობო შენობები დააზიანეს და გაძარცვეს, საკუთარი ქმედებებისთვის პასუხს აგებენ. ინფორმაციას Associated Press ავრცელებს.
მაკრონმა საფრანგეთის სხვადასხვა ქალაქში საპროტესტო აქციების პარალელურად მომხდარი ძალადობა და ვანდალიზმი დაგმო და განაცხადა, რომ „არაფერი ამართლებს“ მომხდარს. მისი თქმით, ქვეყანაში ყველანი გაბრაზებასა და სირცხვილს გრძნობენ.
„თავდასხმა განხორციელდა საჯარო დაწესებულებებზე, მაღაზიებსა და მუნიციპალურ შენობებზე. ზოგიერთი მათგანი განადგურდა. ასობით პოლიციელი დაშავდა. როდესაც კადრებს ვუყურებდით, ყველას გვიჩნდებოდა კითხვა: რა ხდებოდა მათ გონებაში? როგორ შეუძლიათ ფრანგებს, ასე მოექცნენ საფრანგეთს? მათ, ვინც ძარცვაში მიიღო მონაწილეობა, მიყენებული ზარალის ანაზღაურება მოუწევთ, ხოლო ისინი, ვინც რესპუბლიკის დამხობას ცდილობდნენ, პასუხს აგებენ“, - განაცხადა მაკრონმა ერისადმი სატელევიზიო მიმართვისას.
ამასთან, საფრანგეთის პრეზიდენტმა პოლიტიკურ ძალებს ძალადობის დაგმობისკენ მოუწოდა.
„ამაღამ ყველანი რისხვასა და სირცხვილს განვიცდით. აუცილებელია გამიჯვნა იმ მომიტინგეებს შორის, რომლებსაც სამართლიანი მოთხოვნები აქვთ, მათგან, ვინც ანადგურებდა, ამსხვრევდა და ძარცვავდა“, – განაცხადა მაკრონმა.
საფრანგეთის პ პრეზიდენტმა დაავალა შესაბამის უწყებებს, შეამოწმონ, ხომ არ იყო დაშვებული ხარვეზები სადაზვერვო ინფორმაციის შეგროვებისას ან პოლიციის მზადყოფნის კუთხით. მან აღნიშნა, რომ საჭიროების შემთხვევაში, პრეფექტებსა და მერებს გარკვეული შეკრებების აკრძალვის უფლებამოსილება მიენიჭებათ.
საპროტესტო მოძრაობა სექტემბერში, სკოლებში მასწავლებელთა ნაკლებობისა და არასათანადო პირობების გამო დაწყებული სტუდენტური გამოსვლებით დაიწყო. მოგვიანებით აქციები გაფართოვდა და მასში პროფკავშირები, სტუდენტები და სხვადასხვა მოძრაობის წარმომადგენლებიც ჩაერთნენ. დემონსტრანტები უკმაყოფილებას გამოთქვამენ ცხოვრების გაძვირების, საწვავის ფასების ზრდის, სოციალური უთანასწორობისა და საჯარო მომსახურების გაუარესების გამო.
