გორში დღეს ოთარ ჩხეიძის ქუჩა გაიხსნა. ამის შესახებ "ჯი-ეიჩ-ენს" გორის მუნიციპალიტეტის პრესსამსახურიდან აცნობეს.
ქუჩას, სადაც დაახლოებით ორმოცდაათი საცხოვრებელი სახლი დგას, ადრე სუვოროვის ქუჩა ეწოდებოდა. ქუჩის ახალი სახელწოდების პრეზენტაციას ოთარ ჩხეიძის ნათესავები, ადგილობრივი ხელისუფლების წარმომადგენლები, გორელი მწერლები და პოეტები ესწრებოდნენ. გორის მუნიციპალიტეტის საკრებულომ სუვოროვის ქუჩისთვის ოთარ ჩხეიძის სახელის დარქმევის შესახებ გადაწყვეტილება მიმდინარე წლის 8 აპრილს მიიღო.
ქართველი მწერალი, ლიტერატურათმცოდნე, ფილოლოგიის მეცნიერებათა კანდიდატი ოთარ ჩხეიძე გორის რაიონში სოფელ ყელქცეულში დაიბადა. იგი ავტორია რომანების და მოთხრობების მთელი სერიის, დრამატული ნაწარმოებების, ლიტერატურულ-კრიტიკული და პუბლიცისტური წერილების. მწერლის შემოქმედება თარგმნილია რამდენიმე უცხო ენაზე. ოთარ ჩხეიძე წლების განმავლობაში კათედრის გამგედ მუშაობდა ნიკოლოზ ბარათაშვილის სახელობის გორის პედაგოგიურ ინსტიტუტში. არის ლიტერატურული პრემიების "საბას" და "ილია ჭავჭავაძის" მფლობელი.
მიმდინარე წელს გორში 14 ქუჩას შეეცვალა სახელი.
