ქარელის მოსახლეობას უფასო სამედიცინო გამოკვლევები ჩაუტარდება. კომპანია "ბლოკ ჯორჯიას" ეგიდით დაგეგმილი აქცია ქარელის რაიონულ საავადმყოფოსა და პოლიკლინიკაში ხვალ, 5 დეკემბერს ჩატარდება. ქარელის მოსახლეობას უფასო კონსულტაციას თბილისიდან მიწვეული პროფესიონალი ექიმები გაუწევენ.
უფრო კონკრეტულად, აქციაში მონაწილეობას მიიღებენ ჰემატოლოგიისა და ტრანსფუზიოლოგიის (სისხლის გადასხმის ინსტიტუტის), გურამიშვილის სახელობის პედიატრიული კლინიკის, IV კლინიკური საავადმყოფოსა და ივ.ჯავახიშვილის სახ. თბილისის სახელმწიფო უნივერსიტეტის კლინიკური საავადმყოფოს, V სამშობიაროს, ქარელის საავადმყოფოსა და პოლიკლინიკის ექიმები.
პაციენტებს მოემსახურებათ ჰემატოლოგი და თერაპევტი, გაუკეთდებათ სისხლის საერთო ანალიზი, ანალიზი პროთრომბინზე, მოთხოვნის მიხედვით დადგინდება ჯგუფი და რეზუსი. მოსახლეობას შესაძლებლობა ექნება (30 ლარის საფასურად) გაიღონ სისხლი დონორობისათვის. დონორებს სისხლის საერთო ანალიზის გარდა ჩაუტარდებათ გამოკვლევები ვირუსებზე. ასევე მათ მოემსახურებათ პედიატრი, ყელ-ყურ-ცხვირის ექიმი, ქირურგი, თერაპევტი, ნერვოპათოლოგი, კარდიოლოგი, რომელიც პაციენტებს უფასოდ გადაუღებს კარდიოგრამას და გაუწევს კონსულტაციას. გარდა ამისა, ქარელის მოსახლეობას ჩაუტარდება უფასო გინეკოლოგიური გამოკვლევა და ექოსკოპიური კვლევები.
კომპანია "ბლოკ ჯორჯია" მსგავსი ტიპის აქციის ჩატარებას სამომავლოდ საგარეჯოს რაიონში გეგმავს.