დეპუტატი გურამ ჩახვაძე ჯართის ბიზნესისთვის არასტაბილური გარემოს შექნას აპროტესტებს. როგორც დღეს ჩახვაძემ "საგადასახადო კოდექსში" ცვლილებების შეტანის შესახებ კანონპროექტის განხილვისას დარგობრივი ეკონომიკისა და ეკონომიკური პოლიტიკის კომიტეტის სხდომაზე აღნიშნა, ბიზნესმენებს უკვე შედგენილი აქვთ ბიზნესგეგმა მიმდინარე წელთან მიმართებაში და ეს ინიციატივა მათში არასტაბილურობას შეიტანს.
მთავრობის საკანონმდებლო ინიციატივით, უქმდება ჯართის ექსპორტზე კანონით დადგენილი ტონაზე 120-ლარიანი გადასახადი და ჯართის ექსპორტზე შემოდის აქციზი, რომლის ოდენობასაც მთავრობა დაადგენს.
ფინანსთა მინისტრის მოადგილემ რუსუდან კემულარიამ აღნიშნა, რომ ექსპორტზე გადასახდელი დამოკიდებული უნდა იყოს ჯართის მსოფლიო ფასებზე, რომელიც ცვალებადია.
მისი თქმით, აუცილებელია ადგილობრივ წარმოებას ხელი შეეწყოს და თუ გამარტივებული იქნება ჯართის ექსპორტი, ბიზნესმენებს აღარ ექნებათ მოტივაცია, ჯართი ადგილობრივ მწარმოებლებს ჩააბარონ.
