ევროკომისიაში აცხადებენ, რომ უკრაინაში რუსეთის ომის დასრულების შემდეგაც ევროკავშირი რუსული გაზის იმპორტის განახლებას არ გეგმავს, რადგან რუსული წიაღისეული საწვავის იმპორტზე უარი ევროკავშირის მოქმედი კანონმდებლობით არის გამყარებული.
ამის შესახებ ევროკომისიის მთავარმა პრესსპიკერმა, პაულა პინიომ ბრიფინგზე განაცხადა.
ევროკომისიაში ხაზგასმით აღნიშნეს, რომ რუსული გაზის იმპორტის ეტაპობრივი აკრძალვა ევროკავშირის ცალკე საკანონმდებლო აქტით არის გათვალისწინებული და სამშვიდობო შეთანხმების შესაძლო გაფორმებაზე დამოკიდებული არ არის.
„ჩვენ გვაქვს მოქმედი კანონმდებლობა, რომელიც არ გვაძლევს საშუალებას, განვაახლოთ რუსეთიდან წიაღისეული საწვავის, კერძოდ, გაზის იმპორტი“, - განაცხადა პინიომ.
მისი თქმით, ევროპამ მოსკოვზე ენერგოდამოკიდებულების გამოცდილებიდან შესაბამისი დასკვნები გამოიტანა.
„იმის მიუხედავად, ომი გრძელდება თუ არა, ჩვენ გავაცნობიერეთ, რა ფასი აქვს რუსეთიდან წიაღისეული საწვავის იმპორტზე დამოკიდებულებას და ეს ფასი უკვე გადავიხადეთ“, - აღნიშნა ევროკომისიის პრესსპიკერმა.
