უკრაინის პრეზიდენტმა ვოლოდიმირ ზელენსკიმ დიდი ბრიტანეთის პრემიერ-მინისტრ ენდი ბერნემთან სატელეფონო საუბარი გამართა და ლონდონის მხრიდან დამატებითი ფინანსური დახმარების შესახებ განაცხადა.
ზელენსკიმ დიდ ბრიტანეთს უკრაინის ურყევი მხარდაჭერისთვის მადლობა გადაუხადა და აღნიშნა, რომ ლონდონმა დამატებით 10 მილიარდი ფუნტი სტერლინგის (11,9 მილიარდ ევრო) გამოყოფის შესახებ მნიშვნელოვანი გადაწყვეტილება მიიღო.
„დღეს დიდმა ბრიტანეთმა დამატებითი ფინანსური მხარდაჭერის შესახებ მნიშვნელოვანი გადაწყვეტილება მიიღო, რომლის საერთო მოცულობა 10 მილიარდი ფუნტი სტერლინგია: 7 მილიარდი ფუნტი მომდევნო სამი წლის განმავლობაში ეკონომიკურ დახმარებას მოხმარდება, კიდევ 3 მილიარდი ფუნტი კი ბრიტანეთის საექსპორტო მხარდაჭერას ითვალისწინებს, ძირითადად, აუცილებელი შეიარაღების მიწოდებისთვის, რაც ჩვენი მოქალაქეების დაცვას გააძლიერებს. ეს ემატება იმ ყოველწლიურ დახმარებას, რომელსაც დიდი ბრიტანეთი უკრაინას უკვე უწევს“, - განაცხადა ზელენსკიმ.
უკრაინის პრეზიდენტმა დახმარების ახალი პაკეტი „ძალიან დროულ ნაბიჯად“ შეაფასა და აღნიშნა, რომ ამ გადაწყვეტილებამ რუსეთს უნდა დაანახოს, რომ უკრაინა მარტო არ დარჩება.
„უკრაინის გაძლიერებისკენ გადადგმული ყოველი ნაბიჯი რუსეთს აახლოებს იმის გაცნობიერებასთან, რომ ეს ომი უნდა დაასრულოს“, - დასძინა ზელენსკიმ.
