"დღეს ზვიად გამსახურდიას მონაპოვარს ვმარხავთ" - ამის შესახებ „კოალიცია ცვლილებისთვის“ ერთ-ერთმა ლიდერმა ნიკა გვარამიამ ოპოზიციის აკრძალვის შესახებ საკონსტიტუციო სარჩელის განხილვისას საკონსტიტუციო სასამართლოში განაცხადა.
გვარამიას თქმით, ახლა "გამრუდებული რეალობის წინაშე ვდგავართ“, რადგან აღნიშნული სარჩელით უნდა აიკრძალოს ბადრი ჯაფარიძე, როგორც პოლიტიკოსი, რომელიც დამოუკიდებლობის აქტზეა ხელმომწერი, ხოლო აკრძალვის შესახებ სარჩელის ხელმომწერია ადამიანი, რომელმაც ზვიად გამსახურდიას კანონიერი ხელისუფლება გადააგდო.
"მომავალში აუცილებლად იტყვიან, რომ დღეს, 36 წლის შემდეგ ჩვენ ვსაუბრობთ იმაზე, რომ პროცესი სრულიად ინვერსიულად ვითარდება, სრულიად შეტრიალებულია და მივდივართ იქ, საიდანაც ამოგვათრია ზვიად გამსახურდიამ, ოღონდ უკვე ზვიად გამსახურდიას გარეშე, რაც ზრდის იმ შანსებს, რომ ისევ იქ აღმოვჩნდეთ, საიდანაც ზვიადის მეშვეობით ამოვედით.
მე არ ვარ პესიმისტურად განწყობილი, ნამდვილად მჯერა ამ ქვეყნის გამარჯვების, ევროინტეგრაციის, მაგრამ მიუხედავად ამისა არ შემიძლია ხაზი არ გავუსვა იმ კატასტროფას, რომლის წინაშეც საქართველო რამდენიმე ადამიანმა დააყენა, მათ შორის ამ დარბაზში მყოფმა ადამიანებმაც.
დღეს ამ გადაწყვეტილებით, რომელსაც ითხოვს „ქართული ოცნება“, გაუქმდება ბადრი ჯაფარიძე, როგორც პოლიტიკოსი. ეს ის კაცია, რომელმაც დამოუკიდებლობის დეკლარაციას ხელი მოაწერა. სამაგიეროდ, ისინი, ვინც კანონიერი ხელისუფლება გადააგდო, თან იარაღით, ამ სარჩელს აწერს ხელს. ასეთი გამრუდებული რეალობა გვაქვს“, - განაცხადა ნიკა გვარამიამ.
მისი თქმით," ქართული ოცნება" ცდილობს შერჩევითობის პრინციპით აკრძალოს ოპოზიციური პარტიები.
"თუ ჩემზე ხდება ამის გამოყენება, მაშინ მასზეც უნდა მოხდეს... ამ შემთვევაში ვასაბუთებ შერჩევითობას, რომ ხელისუფლება იყენებს მის ხელთარსებულ უფლებამოსილებას იმ ქმედებებისთვის, რასაც თავად სჩადის, დასაჯოს სხვა. ამის დასაბუთებას ვცდილობ. თუ ეს მნიშვნელოვანი არ არის, მაშინ ამიხსენით, რა არის მნიშვნელოვანი."- განაცხადა გვარამიამ.
