"ვიკილიქსის" დამფუძნებელმა ჯულიან ასანჯიმ ინტერნეტი მსოფლიოში "ჯაშუშობის უდიდეს სისტემად" მოიხსენია. მან აღნიშნა, რომ ინტერნეტი სიტყვის თავისუფლების განვითარებას ყოველთვის არ უწყობს ხელს.
ასანჯის თქმით, ინტერნეტი ხელისუფლებების ქმედებებს გამჭვირვალობას სძენს, თუმცა არასდროს ჰქონია ხელისუფლებას ისეთი შესაძლებლობა, თვალყური ადევნოს დისიდენტებს.
"ინტერნეტტექნოლოგიები სიტყვის თავისუფლებას ხელს არ უწყობს. ეს ტექნოლოგიები ადამიანის უფლებების გამყარებას არ ემსახურება. არ აუმჯობესებს მოქალაქეთა ცხოვრებას. ეს ის ტექნოლოგიებია, რომლებიც, შესაძლოა, ტოტალური ჯაშუშობის რეჟიმის დასამყარებლად გამოიყენონ. მეორე მხრივ, თუკი ჩვენ, აქტივისტები, ინტერნეტს ხელში ჩავიგდებთ, იგი შეიძლება იმ ტექნოლოგიად გადაიქცეს, რისი დანახვაც ასე გვწადია", _ აღნიშნა ასანჯიმ კემბრიჯის უნივერსიტეტის სტუდენტების წინაშე სიტყვით გამოსვლისას.
ასანჯი მიიჩნევს, რომ "ფეისბუკსა" და "ტვიტერს" არაბეთში არეულობის პროვოცირებაში ისეთი გადამწყვეტი წვლილი არ მიუძღვის, რასაც მიაწერენ.
"მართალია, მათ თავიანთი როლი შეასრულეს, მაგრამ არა ისეთი, როგორც ალ ჯაზირამ", _ აღნიშნა ასანჯიმ.
ასანჯი დარწმუნებულია, რომ ზუსტად "ვიკილიქსის" პუბლიკაციებმა შეასრულეს გადამწყვეტი როლი არაბეთში არეულობის გაჩაღებასა და აშშ-ის ხელისუფლების გადაწყვეტილებაში, რათა მათ ეგვიპტის ყოფილი პრეზიდენტის ჰოსნი მუბარაქისათვის მხარი არ დაეჭირათ.
სიტყვით გამოსვლის დროს ასანჯიმ, ასევე, გააკრიტიკა გაზეთი ნიუ-იორკ-თაიმსი, რომელიც ასანჯის თქმით, ავღანეთში ამერიკული არმიის საიდუმლო სამხედრო მოქმედებებს მალავდა.
უფრო ადრე გავრცელდა ინფორმაცია, რომ ბრიტანეთის სასამართლომ ვიკილიქსის დამფუძნებლის ჯულიან ასანჯის შვედეთში ექსტრადაციის გადაწყვეტლება მიიღო.
