ევროკავშირის საბჭომ უკრაინის შეიარაღებული ძალებისთვის დამატებით 1 მილიარდი ევროს ღირებულების სამხედრო დახმარების მობილიზება დაამტკიცა. თანხა ევროპის მშვიდობის ფონდის (EPF) ფარგლებში გამოიყოფა და ახალი სამხედრო აღჭურვილობის ერთობლივ შესყიდვას მოხმარდება.
ინფორმაციას ამის შესახებ ევროკავშირის საბჭოს პრესსამსახური ავრცელებს.
საბჭოს მიერ მიღებული ორი გადაწყვეტილება ითვალისწინებს როგორც ლეტალური, ისე არალეტალური სამხედრო აღჭურვილობის შესყიდვას. დახმარების პაკეტი მოიცავს უპილოტო საფრენ აპარატებს, საჰაერო თავდაცვის სისტემებსა და აღჭურვილობას, საბრძოლო მასალას, ელექტრონული ბრძოლის საშუალებებს, რადარის სისტემებსა და ასაფეთქებელ საშუალებებს.
ევროკავშირის საბჭოს განცხადებით, შეძენილი აღჭურვილობის უკრაინისთვის მიწოდება არაუგვიანეს 2027 წლის ბოლომდე უნდა განხორციელდეს.
ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა განაცხადა, რომ დახმარების გამოყოფის გადაწყვეტილება რუსული თავდასხმების ფონზე მიიღეს.
„ბოლო 24 საათის განმავლობაში რუსეთმა უკრაინელი მშვიდობიანი მოქალაქეები დახოცა, კიევში რამდენიმე საელჩო დააზიანა და პოლონეთის საჰაერო სივრცე დაარღვია. არ არსებობს არანაირი ნიშანი იმისა, რომ რუსეთს მშვიდობა სურს - მოსკოვის ქმედებები საპირისპიროზე მეტყველებს. დღეს უკრაინის თავდაცვისუნარიანობის გასაძლიერებლად დამატებით 1 მილიარდი ევროს გამოყოფას ვამტკიცებთ. ეს თანხა დააფინანსებს დრონებს, საჰაერო თავდაცვას, საბრძოლო მასალასა და სხვა შესაძლებლობებს, რომლებიც უკრაინას გადაუდებლად სჭირდება. უკრაინას შეუძლია ევროპას დაეყრდნოს როგორც ბრძოლის ველზე, ისე მოლაპარაკებების მაგიდასთან საკუთარი პოზიციების გასაძლიერებლად“, - განაცხადა კალასმა.
ევროკავშირის საბჭოს განმარტებით, დღევანდელი გადაწყვეტილებები 2026 წლის 25 სექტემბერს ევროკავშირის წევრი სახელმწიფოების მიერ მიღწეული პოლიტიკური შეთანხმების განხორციელების კიდევ ერთი ეტაპია. შეთანხმება უკრაინის დასახმარებლად ევროპის მშვიდობის ფონდის ფარგლებში ჯამში 6.6 მილიარდი ევროს მობილიზებას ითვალისწინებს.
საბჭოს ინფორმაციით, 2021 წლიდან ევროკავშირმა ევროპის მშვიდობის ფონდის მეშვეობით უკრაინას ჯამში 11.8 მილიარდი ევროს დახმარება გაუწია. ამ თანხიდან 9.9 მილიარდი ევრო წევრი სახელმწიფოების მიერ უკრაინისთვის გაწეული ორმხრივი სამხედრო დახმარების ანაზღაურებას, 950 მილიონი ევრო კი უკრაინის სამხედრო დახმარების მისიის დაფინანსებას მოხმარდა.
გარდა ამისა, რუსეთის გაყინული აქტივებიდან მიღებული დამატებითი შემოსავლებიდან ევროპის მშვიდობის ფონდის მეშვეობით უკრაინის პრიორიტეტული საჭიროებებისთვის 3.5 მილიარდი ევრო გამოიყო.