უკრაინის პრეზიდენტის, ვოლოდიმირ ზელენსკის განცხადებით, რუსეთის პრეზიდენტმა ვლადიმირ პუტინმა უკრაინაზე მასშტაბური იერიში ჩინეთში გამართული შეხვედრების შემდეგ განახორციელა. მისი თქმით, მოსკოვი ამ გზით დიპლომატიური წარუმატებლობისა და ფრონტზე დასუსტებული პოზიციების კომპენსირებას ცდილობს.
„პუტინმა დარტყმა ძალიან დემონსტრაციულად განახორციელა - ჩინეთში წარუმატებელი შეხვედრებისა და მისი განზრახვის ფაქტობრივი ჩავარდნის შემდეგ, როგორმე „გადაენაწილებინა“ მსოფლიო. ამას ისიც ემატება, რომ რუსეთის პოზიციები ფრონტზე მთელი ამ წლის განმავლობაში ყველაზე სუსტია.
რუსეთი საკუთარ სამხედრო და დიპლომატიური უუნარობის კომპემნსირებას სწორედ ასეთი ტერორით, სწორედ სიცოცხლეზე ასეთი დარტყმებით ცდილობს, რომ აუნაზღაუროს“, - განაცხადა ზელენსკიმ.
უკრაინის პრეზიდენტმა პარტნიორებს მოუწოდა, შეასრულონ საჰაერო თავდაცვის გაძლიერებასთან დაკავშირებით მიღწეული შეთანხმებები. მისი თქმით, 20 ნოემბერს საგარეო საქმეთა სამინისტროს დაავალა, დაუკავშირდეს თითოეულ პარტნიორს, რომელიც უკრაინის საჰაერო თავდაცვისთვის დახმარების პაკეტს უკვე ამზადებს, რათა მიწოდება დაჩქარდეს.
გარდა ამისა, ზელენსკიმ თავდაცვის მინისტრთან ერთად განიხილა აშშ-სთან მოლაპარაკებები PAC-2 და PAC-3 რაკეტების მიწოდების საკითხზე. პრეზიდენტის განცხადებით, უკრაინა იმედოვნებს, რომ პენტაგონი მათ გადაცემას დაამტკიცებს.
20 ნოემბრის ღამეს რუსეთმა უკრაინაზე ბალისტიკური და ფრთოსანი რაკეტებითა და დრონებით იერიში მიიტანა.
უკრაინის საჰაერო ძალების ინფორმაციით, 20 ნოემბრის 10:30 საათის მდგომარეობით, საჰაერო თავდაცვის სისტემებმა 462 საჰაერო სამიზნე გაანადგურეს. მათ შორის იყო:
3 რაკეტა „ისკანდერ-М“/С-400/„ცირკონის“ ჯგუფიდან;
79 ფრთოსანი რაკეტა Х-101 და „კალიბრი“;
380 უპილოტო საფრენი აპარატი.
მტრის რაკეტებმა და დამრტყმელმა დრონებმა 23 ობიექტს დაარტყეს, კიდევ 10 ლოკაციაზე კი ჩამოგდებული სამიზნეების ნამსხვრევები ჩამოცვივდა.
უკრაინული მედიის ცნობით, თავდასხმას 8 ადამიანი ემსხვერპლა, მათგან 6 - კიევში.