რუსეთის მიერ კიევზე ღამით განხორციელებული ბალისტიკური შეტევის შედეგად, დედაქალაქში პოდილსკო-ვოსკრესენსკის, დარნიცისა და სამხრეთის ხიდები დაზიანდა. პოდილსკის ხიდზე მოძრაობა ნაწილობრივ შეზღუდულია.
უკრაინული მედიის ცნობით, ამის შესახებ კიევის მერმა ვიტალი კლიჩკომ განაცხადა.
მისი ინფორმაციით, პოდილსკო-ვოსკრესენსკის ხიდზე მარჯვენა სანაპიროდან მარცხენა სანაპიროს მიმართულებით მოძრაობა დროებით სრულად დაიკეტა. დაზიანებულია დარნიცის ხიდიც.
„სამხრეთის ხიდზე იერიში კვლავ მიიტანეს. ამ დროისთვის მოძრაობა შეზღუდულია - დაშვებულია მხოლოდ მარცხენა სანაპიროდან მარჯვენა სანაპიროს მიმართულებით გადაადგილება. ნებადართულია 10 ტონამდე მასის ავტომობილებისა და 18 ტონამდე მასის საზოგადოებრივი ტრანსპორტის მოძრაობა“, - განაცხადა კლიჩკომ.
მისივე თქმით, პოდილსკისა და დარნიცის ხიდებზე დაზიანებების ხარისხს სპეციალისტები საჰაერო განგაშის დასრულების შემდეგ შეაფასებენ.
20 ნოემბრის ღამეს რუსეთის ძალებმა კიევზე ბალისტიკური რაკეტებით არაერთი იერიში მიიტანეს. თავდასხმების შედეგად დედაქალაქის სამ რაიონში შენობებში ხანძარი გაჩნდა, დაზიანდა კრიტიკული ინფრასტრუქტურის ობიექტიც.