ევროპას უსაფრთხოების ახალი წესრიგი არ სჭირდება. მას უკვე აქვს ასეთი წესრიგი, რომელსაც რუსეთი მუდმივად არღვევს, - ამის შესახებ უკრაინის საგარეო საქმეთა მინისტრი ანდრი სიბიჰა სოციალურ ქსელში წერს.
მისი თქმით, პუტინს მოლაპარაკებებზე მხოლოდ ის შეუძლია მოითხოვოს, რომ ცეცხლის სამართლიანი შეწყვეტა ფრონტის ამჟამინდელი ხაზის გასწვრივ მოხდეს.
"პუტინი ევროპის უსაფრთხოების წესრიგის ხელახლა ჩამოყალიბების იდეებს აჟღერებს. ოცნებებში მას თავი 1945 წლის იალტაში წარმოუდგენია. პრობლემა ის არის, რომ ამ მასშტაბის წინადადებების წამოსაყენებლად ჯერ მსოფლიო ომი უნდა მოიგო.
ბოლო მონაცემებით, რუსეთმა ოთხი წელი და რვა თვე დახარჯა ზაპოროჟიეს ოლქში მდებარე სოფელ მალაია ტოკმაჩკას „თითქმის“ დასაპყრობად. რუსეთმა 1,6 მილიონზე მეტი სამხედრო დაკარგა - დაღუპულებისა და დაჭრილების სახით, თუმცა შეჭრის ვერც ერთი მიზნისთვის ვერ მიუღწევია. მხოლოდ ოქტომბერში მან 54 400 ოკუპანტი დაკარგა, მაშინ როცა უკრაინამ უფრო მეტი ტერიტორია გაათავისუფლა, ვიდრე რუსეთმა შეძლო დაეკავებინა.
ამ ეტაპზე პუტინს მოლაპარაკებებზე მაქსიმუმ ის შეუძლია მოითხოვოს, რომ ცეცხლის სამართლიანი შეწყვეტა ფრონტის ამჟამინდელი ხაზის გასწვრივ მოხდეს და არა ევროპაში გავლენის სფეროების გადანაწილება.
სიმართლე რომ ვთქვათ, ევროპას უსაფრთხოების ახალი წესრიგი არ სჭირდება. მას უკვე აქვს ასეთი წესრიგი, რომელსაც რუსეთი მუდმივად არღვევს. უსაფრთხო და თავისუფალი ევროპის საუკეთესო გზა უკრაინის წინააღმდეგ რუსეთის აგრესიის დასრულებაა", - წერს სიბიჰა.
