აშშ-ის პრეზიდენტი დონალდ ტრამპი Reuters-ის ჟურნალისტს მას შემდეგ დაუპირისპირდა, რაც მან ჰკითხა, უკავშირდებოდა თუ არა კანზასში დაგეგმილი საარჩევნო მიტინგის გაუქმება პრეზიდენტის დაღლილობასა და ხშირი მგზავრობით გადაღლას.
ინციდენტი 29 ოქტომბერს, ვაშინგტონის მახლობლად, ენდრიუსის სამხედრო-საჰაერო ბაზაზე მოხდა, როდესაც ტრამპი ჟურნალისტების კითხვებს პასუხობდა. Reuters -ის კორესპონდენტმა ჯეიკობ ბოგეიჯმა პრეზიდენტს ჰკითხა, ხომ არ იყო კანზასში ვიზიტის გაუქმების მიზეზი ის, რომ მას ხშირი მგზავრობა მობეზრდა.
„ასეთი კითხვა ავადმყოფმა უნდა დასვას. ავადმყოფი ხარ. რა მედიასაშუალებიდან ხარ?“ - მიმართა ტრამპმა ჟურნალისტს.
მას შემდეგ, რაც კორესპონდენტმა უპასუხა, რომ Reuters-ის წარმომადგენელი იყო, აშშ-ის პრეზიდენტმა სააგენტოც გააკრიტიკა.
„სხვათა შორის, Reuters-ი საშინელებაა. შეხედეთ ამ კაცს, ფორმაში არ არის. (...) საზიზღრად გამოიყურები! ფორმაში ჩადექი, საშინლად გამოიყურები“, - განაცხადა ტრამპმა.
ჟურნალისტმა განმარტა, რომ მისი მიზანი პრეზიდენტის ჯანმრთელობის მდგომარეობის შესახებ ინფორმაციის მიღება იყო. ტრამპმა კი კიდევ ერთხელ აღნიშნა, რომ თავს შესანიშნავად გრძნობდა და კანზასში ჩასვლას საჭიროდ არ მიიჩნევდა.
„ორი კვირაა, დამყვები. თავს შესანიშნავად ვგრძნობ“, - უთხრა მან ჟურნალისტს.
ტრამპს კანზასში რესპუბლიკელი სენატორის, როჯერ მარშალის მხარდასაჭერად საარჩევნო მიტინგი 31 ოქტომბერს უნდა გაემართა, თუმცა ღონისძიება გაუქმდა. რესპუბლიკური პარტიის განცხადებით, პრეზიდენტი კანზასისა და აიოვის შტატებში დაგეგმილ ღონისძიებებში დისტანციურად მიიღებს მონაწილეობას.
აშშ-ში 3 ნოემბერს შუალედური არჩევნები გაიმართება, რომლებზეც გადაწყდება, შეინარჩუნებენ თუ არა რესპუბლიკელები კონგრესის ორივე პალატაში უმრავლესობას.
