ისრაელის ცენტრალურმა საარჩევნო კომისიამ საპარლამენტო არჩევნების საბოლოო შედეგები გამოაქვეყნა. ხმების დათვლის შედეგად, პრემიერ-მინისტრ ბენიამინ ნეთანიაჰუს მმართველი კოალიციის ბლოკმა ქნესეთში 53 მანდატი მიიღო, ოპოზიციურმა ბლოკმა, რომელსაც გადამდგარი გენერალი გადი აიზენკოტი ხელმძღვანელობს, 48, ხოლო არაბულმა პარტიებმა ჯამში 19 მანდატი მოიპოვეს. ინფორმაციას The Times of Israel ავრცელებს.
ისრაელის 120-ადგილიან ქნესეთში მთავრობის დამოუკიდებლად ჩამოსაყალიბებლად 61 მანდატია საჭირო. შესაბამისად, არჩევნების საბოლოო შედეგებით, ვერც ერთმა ძირითადმა პოლიტიკურმა ბლოკმა საპარლამენტო უმრავლესობა ვერ მოიპოვა.
არჩევნებში მმართველი ბლოკის შედეგი წინა მოწვევის ქნესეთთან შედარებით მნიშვნელოვნად გაუარესდა: ნეთანიაჰუს მოკავშირე პარტიებს მანამდე 68 მანდატი ჰქონდათ, ახლა კი 53 მოიპოვეს. ამასთან, არაბულმა პარტიებმა ჯამში 19 მანდატი მიიღეს, რაც მათი ისტორიაში საუკეთესო შედეგია.
არჩევნებში ამომრჩეველთა აქტივობამ 77.9% შეადგინა - ხმა 5 716 665-მა ადამიანმა მისცა. ნეთანიაჰუს პარტიამ, „ლიკუდმა“ 27 მანდატი მიიღო.
ნეთანიაჰუს პარტია არჩევნების შედეგებს არ ეთანხმება და აცხადებს, რომ არჩევნები მოიპარეს. მისი პარტია, „ლიკუდი“, ამტკიცებს, რომ არაბულ პარტიებს არჩევნებში უცხოური ძალების დახმარებით ჩარევის შესაძლებლობა ჰქონდათ.
„ისრაელში არჩევნები მოიპარეს!“ - ნათქვამია „ლიკუდის“ განცხადებაში. პარტიის მტკიცებით, სავარაუდო ჩარევის მიზანი იყო „ქნესეთზე უცხოური კონტროლის დამყარება, ისრაელის ისლამიზაცია და მემარჯვენე მთავრობის დამხობა“. ამასთან, მტკიცებულებები, რომლებიც ამ ბრალდებებს დაადასტურებდა, წარმოდგენილი არ ყოფილა.
ნეთანიაჰუმ არჩევნების შემდეგ მხარდამჭერებთან გამოსვლისას განაცხადა, რომ ისრაელს „ძლიერი, მემარჯვენე მთავრობა“ სჭირდება. ამავე დროს, მისი პარტია ცდილობს ეჭვქვეშ დააყენოს შედეგები, რომლებმაც მმართველ ბლოკს საპარლამენტო უმრავლესობა დააკარგვინა.
ისრაელის ცენტრალური საარჩევნო კომისიის ხელმძღვანელმა ნოამ სოლბერგმა შესაძლო უცხოური ჩარევის შესახებ ინფორმაციის შესწავლა შინაგან უსაფრთხოებაზე პასუხისმგებელ სამსახურს, შინ ბეთს სთხოვა. თუმცა კომისიის ხელმძღვანელის მოვალეობის შემსრულებელმა დინ ლივნემ განმარტა, რომ გამოძიება საბოლოო შედეგებზე გავლენას არ მოახდენს. კომისიამ ასევე უარყო სისტემური საარჩევნო დარღვევების შესახებ გავრცელებული ცნობები.
ოპოზიციის ლიდერმა გადი აიზენკოტმა ნეთანიაჰუს პარტია არჩევნების შედეგების დელეგიტიმაციის მცდელობაში დაადანაშაულა. მისი თქმით, „ისინი ამას იმიტომ აკეთებენ, რომ არჩევნები წააგეს“.
ამჟამად ისრაელში მთავრობის ფორმირებისთვის მოლაპარაკებებია მოსალოდნელი. ოპოზიციურ ბლოკს უმრავლესობის შესაქმნელად არაბულ პარტიებთან თანამშრომლობა დასჭირდება, თუმცა ასეთი კოალიციის შექმნა პოლიტიკური თვალსაზრისით რთული იქნება. ნეთანიაჰუ კი ამგვარ თანამშრომლობას ეწინააღმდეგება.
