12 სექტემბრის ღამეს რუსეთში, ტოლიატსა და ტაგანროგში მდებარე ობიექტებზე დრონებით იერიში განხორციელდა. ინფორმაციას უკრაინული მედია Telegram-არხებზე დაყრდნობით ავრცელებს.
ტოლიატი სამარის, ხოლო ტაგანროგი როსტოვის ოლქში მდებარეობს. თავდასხმის შედეგად ხანძარი გაჩნდა.
წყარო: მონიტორინგის Telegram-არხები, რუსეთის სამარის ოლქის გუბერნატორი ვიაჩესლავ ფედორიშჩევი
დეტალები: მონიტორინგის ჯგუფების წინასწარი ინფორმაციით, ტოლიატიში იერიშის სამიზნე ქიმიური ქარხანა „კუიბიშევაზოტი“ გახდა. თვითმხილველები ქალაქის სამრეწველო ზონაში გაჩენილი ხანძრის ამსახველ ვიდეოებს ავრცელებდნენ.
„კუიბიშევაზოტი“ რუსეთის ერთ-ერთი უმსხვილესი ქიმიური პროდუქციის მწარმოებელი საწარმოა. კომპანია ამიაკს, კარბამიდს, ამონიუმის გვარჯილას, კაპროლაქტამსა და პოლიამიდს აწარმოებს. აღნიშნულ პროდუქტებს რუსეთის სამხედრო-სამრეწველო კომპლექსისთვის კრიტიკული მნიშვნელობა აქვს.
ამავდროულად, როსტოვის ოლქის ქალაქ ტაგანროგში აფეთქებების სერია მოხდა, რის შემდეგაც რამდენიმე ადგილზე ხანძარი გაჩნდა.
OSINT-ანალიზის შედეგად, ASTRA-ს ინფორმაციით, კვამლი სამხედრო აეროდრომზე ავარდა, სადაც რუსეთის 708-ე სამხედრო-სატრანსპორტო საავიაციო პოლკია განთავსებული.
