აშშ-ის კონგრესი რუსეთის წინააღმდეგ სანქციებზე კანონპროექტს, რომელიც აშშ-ის სენატმა ივლისში დაამტკიცა, კონგრესის წარმომადგენელთა პალატაში კენჭს მომავალ კვირას უყრიან. ამის შესახებ Bloomberg ინფორმირებულ წყაროზე დაყრდნობით წერს.
კანონპროექტი, რომლის ერთ-ერთი ავტორი აწ გარდაცვლილი სენატორი ლინდსი გრემი იყო, აშშ-ის პრეზიდენტს უფლებამოსილებას ანიჭებს, რუსეთის ნედლი ნავთობისა და ბუნებრივი აირის ხუთ უმსხვილეს მყიდველს 100%-იანი საბაჟო ტარიფები დაუწესოს. შესაბამისად, პოტენციური სანქციების სამიზნე შესაძლოა ჩინეთი, ინდოეთი და თურქეთი გახდნენ.
Bloomberg-ის ინფორმაციით, კანონპროექტს კენჭს ჩვეულებრივი პროცედურით უყრიან, რომლის მიხედვითაც მის დასამტკიცებლად ხმების უბრალო უმრავლესობაა საჭირო.
გამოცემა აღნიშნავს, რომ კანონპროექტს მანამდე დემოკრატების მხრიდან მწვავე კრიტიკა მოჰყვა. ისინი უკმაყოფილებას გამოთქვამდნენ იმის გამო, რომ დოკუმენტი დონალდ ტრამპს საკუთარი შეხედულებისამებრ საბაჟო ტარიფების დაწესების უფლებამოსილებას ანიჭებს.
თუმცა, საბოლოოდ, წარმომადგენელთა პალატის ხელმძღვანელობამ კანონპროექტის კენჭისყრაზე გატანა გადაწყვიტა, რადგან მას კვლავ აქვს ორივე პარტიისა და თეთრი სახლის მხარდაჭერა.
