უკრაინის პრეზიდენტმა ვოლოდიმირ ზელენსკიმ განაცხადა, რომ თუ ამ ეტაპზე მშვიდობის მიღწევა შეუძლებელია, ენერგეტიკული ზავისა და სასურსათო უსაფრთხოების საკითხები მაინც უნდა გადაწყდეს. მისი თქმით, უკრაინელები საკვების გარეშე არ დარჩებიან.
ამის შესახებ ზელენსკიმ იალტის ევროპული სტრატეგიის შეხვედრაზე განაცხადა.
„აგროსამრეწველო სექტორი და ენერგეტიკა დღეს მთელი მსოფლიოს ორი გამოწვევაა. თუ დღეს მშვიდობის მიღწევა შეუძლებელია მხოლოდ იმიტომ, რომ ერთ ადამიანს ეს არ სურს, შესაძლებელია ენერგეტიკული ზავისა და სასურსათო უსაფრთხოების საკითხების მოგვარება. ასეთი გადაწყვეტილებების მიღება შესაძლებელია. ამ საკითხებს დიდი ხანია ვაყენებთ, თუმცა ახლა ეს განსაკუთრებით აქტუალურია“, - განაცხადა ზელენსკიმ.
მისი თქმით, ომის გაჭიანურება უკვე არა მხოლოდ უკრაინის, არამედ რუსეთის ეკონომიკისა და მთელი მსოფლიოსთვისაც წარმოადგენს გამოწვევას. მაგალითად, მან შავი ზღვის გავლით სურსათის გადაზიდვის დერეფნის ბლოკირება მოიყვანა.
ამასთან, ზელენსკიმ აღნიშნა, რომ „უკრაინელები საკვების გარეშე არ დარჩებიან“.
„მარცვლეულის ფასი შემცირდება, რადგან ექსპორტი გაძვირდება, ამ ვაჭრობის ინფრასტრუქტურა გართულდება, ლოგისტიკა კი საშინელი იქნება. ჩვენთვის ეს ძალიან რთული იქნება. თუმცა, უკრაინის გარდა, გაცილებით მძიმე მდგომარეობაში აღმოჩნდებიან სხვა ქვეყნები, სადაც უბრალოდ საკვები აღარ იქნება. ბევრი ხალხი საკვების გარეშე დარჩება, მიუხედავად იმისა, რომ მათ ფული ექნებათ. ეს რეალობაა. ეს იქნება ჰორმუზის მსგავსი კრიზისი, ოღონდ უკვე აგროსფეროში. და ეს სერიოზული პრობლემაა. ამ საკითხის მოგვარება მხოლოდ უკრაინის საქმე არ უნდა იყოს, რადგან ეს ბევრი ქვეყნისთვის წარმოადგენს გამოწვევას“, - აღნიშნა უკრაინის პრეზიდენტმა.
