რუსეთის მიერ ღამით განხორციელებული თავდასხმის შედეგად მოლდოვასთან საზღვარზე მდებარე საერთაშორისო გამშვები პუნქტი „ტაბაკი“ დაზიანდა, რის გამოც ამჟამად მგზავრებისა და სატრანსპორტო საშუალებების გატარება შეჩერებულია. ამის შესახებ უკრაინის სახელმწიფო სასაზღვრო სამსახურმა განაცხადა.
„ოდესის ოლქში მტრის თავდასხმის შედეგად დაზიანდა გამშვები პუნქტი „ტაბაკი“. 21 აგვისტოს ღამით მტერმა ოდესის ოლქის ბოლგრადისა და იზმაილის რაიონებზე „შაჰედებით“ იერიში მიიტანა“, - ნათქვამია უწყების განცხადებაში.
თავდასხმის შედეგად მოლდოვასთან სასაზღვრო საერთაშორისო გამშვები პუნქტის „ტაბაკის“ ინფრასტრუქტურა დაზიანდა. დაზიანებულია გამშვები პუნქტის შენობები და ნაგებობები. ობიექტებზე გაჩენილი ხანძრების უკრაინის საგანგებო სიტუაციების სახელმწიფო სამსახურის თანამშრომლების მიერ ამ დროისთვის ლოკალიზებულია.
უკრაინის სახელმწიფო სასაზღვრო სამსახურის განცხადებით, ამჟამად „ტაბაკის“ გამშვები პუნქტის გავლით მგზავრებისა და სატრანსპორტო საშუალებების გატარება არ ხორციელდება. მომხდარის შესახებ ინფორმირებულია მოლდოვის მხარე.
სატრანსპორტო ნაკადები სხვა გამშვები პუნქტებისკენ გადამისამართდება.
