რუსეთმა ირანისთვის ტროტილის, საბრძოლო მასალისა და დრონების კომპონენტების მიწოდება დაიწყო, რათა თეირანს აშშ-ისა და ისრაელის დარტყმების შემდეგ იარაღის მარაგების შევსებაში დაეხმაროს. ამის შესახებ NBC News ინფორმაციას ერთ-ერთი ევროპული ქვეყნის მთავრობის დოკუმენტზე დაყრდნობით ავრცელებს.
დოკუმენტის ნამდვილობა ერთ-ერთმა ევროპელმა მაღალჩინოსანმა დაადასტურა.
NBC-ის ცნობით, აშშ-სა და ისრაელს არ შეუძლიათ რუსულ და ირანულ პორტებს შორის მოძრავი ყველა ტვირთის შეჩერება, რადგან გადაზიდვები კასპიის ზღვის გავლით ხორციელდება. კასპიის ზღვას ოკეანესთან გასასვლელი არ აქვს და მას რუსეთი, ირანი, ყაზახეთი, თურქმენეთი და აზერბაიჯანი ესაზღვრება.
ევროპული ქვეყნის მთავრობის ინფორმაციით, გადაზიდვები გაგრძელდა მას შემდეგაც, რაც ისრაელმა ირანის ჩრდილოეთ სანაპიროზე, ბანდარ-ენზალის საპორტო კომპლექსს დაარტყა. ვარაუდობენ, რომ ეს პორტი მოსკოვსა და თეირანს შორის იარაღის ტრანზიტისთვის გამოიყენებოდა.
NBC-ის შეფასებით, ეს მიწოდებები კრემლსა და ირანის ისლამური რესპუბლიკის ხელისუფლებას შორის სტრატეგიული ალიანსის გაღრმავებაზე მიუთითებს.
ტელეარხი ასევე აღნიშნავს, რომ რუსეთის მიერ უკრაინაში სრულმასშტაბიანი შეჭრის პირველ წლებში დახმარებას ირანი თავად რუსეთს უწევდა: თეირანმა მოსკოვს Shahed-ის ტიპის დამრტყმელი დრონები და მათი წარმოების ტექნოლოგია გადასცა. რუსეთმა ირანული ტექნოლოგიების მოდერნიზება შეძლო და უკრაინაზე დარტყმებისთვის ასეთი უპილოტო საფრენი აპარატების საკუთარი წარმოება ააწყო.
2026 წლის მარტში Financial Times დასავლურ სადაზვერვო წყაროებზე დაყრდნობით იტყობინებოდა, რომ რუსეთმა ირანისთვის დრონების მიწოდება დაიწყო, ასევე ირანის ხელისუფლებას გადასცა სატელიტური ფოტოები, სადაზვერვო მონაცემები და ინფორმაცია ახლო აღმოსავლეთში აშშ-ის პოზიციებზე დარტყმებისთვის.
