ევროპაში ნატო-ს გაერთიანებული შეიარაღებული ძალების უმაღლესი მთავარსარდლის შტაბის პრესსპიკერმა, ამერიკელმა პოლკოვნიკმა მარტინ ო’დონელმა განაცხადა, რომ კვირას რუმინეთში ჩამოგდებული დრონი, სავარაუდოდ, რუსული წარმომავლობის იყო.
ამის შესახებ Reuters წერს.
ო’დონელმა რუმინეთის თავზე ესპანური გამანადგურებლის მიერ დრონის ჩამოგდებაზე საუბრისას განაცხადა, რომ ალიანსი მუდმივად გაძლიერებული მზადყოფნის რეჟიმში იმყოფება და ნებისმიერი საფრთხისგან თავდაცვისთვის მზად არის.
„კვირას მომხდარი ინციდენტის დამატებითი დეტალები ჯერ კიდევ გამოძიების პროცესშია, თუმცა, როგორც ჩანს, დრონი რუსულია“, - განაცხადა ნატო-ს წარმომადგენელმა.
რუმინეთის თავდაცვის სამინისტროს დრონის წარმომავლობა არ დაუკონკრეტებია. უწყების განცხადებით, რადარებმა ის მაშინ დააფიქსირეს, როდესაც დრონი მეზობელი მოლდოვიდან ქვეყნის საჰაერო სივრცეში შევიდა, ჩრდილოეთით, ქალაქ გალაციდან 24 კილომეტრში.
რუმინეთს უკრაინასთან 614 კილომეტრის სიგრძის საერთო სახმელეთო საზღვარი აქვს. ბოლო ოთხი წლის განმავლობაში ქვეყანა არაერთხელ აცხადებდა, რომ მისი საჰაერო სივრცე რუსულმა დრონებმა დაარღვიეს. ასევე, შავი ზღვის სანაპიროსთან, მნიშვნელოვან სავაჭრო და ენერგეტიკულ მარშრუტებზე, მცურავი ნაღმების აღმოჩენის შესახებაც არაერთხელ გავრცელდა ინფორმაცია.
