ომანის სამხრეთში, რას მადრაქას კონცხთან, ნავთობით დაბინძურებამ სანაპიროს უკვე დაახლოებით 12 კილომეტრი მოიცვა. ამის შესახებ ომანის სახელმწიფო საინფორმაციო სააგენტო ONA იტყობინება.

ნავთობმა ტანკერ Caroline Bezengi-დან, რომელიც შესაძლოა რუსეთის ე.წ. „ჩრდილოვან ფლოტს“ ეკუთვნოდეს, ომანის სანაპიროს 12 აგვისტოს მიაღწია. ამის შესახებ Reuters-მა გაეროს საერთაშორისო საზღვაო ორგანიზაციაზე დაყრდნობით გაავრცელა ინფორმაცია.

ნავთობის ლაქა არაბეთის ზღვაში რამდენიმე კვირის განმავლობაში ვრცელდებოდა. ომანის გარემოს დაცვის უწყების ინფორმაციით, დაბინძურების შედეგების აღმოსაფხვრელად სამუშაოები მიმდინარეობს. ამ დროისთვის ნავთობს მასირას კუნძულის სანაპირომდე არ მიუღწევია, რომელიც მატერიკიდან დაახლოებით 20 კილომეტრში მდებარეობს.

ტანკერი Caroline Bezengi ივნისის ბოლოს ომანის სანაპიროსთან მეჩეჩზე დაჯდა. გემზე დაახლოებით 800 ათასი ბარელი რუსული ნავთობი იყო. Reuters-ის ინფორმაციით, დაღვრის შედეგად წარმოქმნილი ნავთობის ლაქის ფართობმა შესაძლოა 2 000 კვადრატულ კილომეტრს გადააჭარბოს.

როგორც Reuters აღნიშნავდა, Caroline Bezengi-ის ბორტზე, რომელიც კამერუნის დროშით დაცურავდა, პრობლემების შესახებ პირველი ცნობები ივნისის დასაწყისში გავრცელდა. ტანკერი ნოვოროსიისკის პორტიდან, სადაც ნავთობი ჩატვირთა, აზიის მიმართულებით მიემართებოდა. ომანის ყურეში გემმა დაზიანების შესახებ ცნობა გაავრცელა. ამის შემდეგ ის ომანის სანაპიროსკენ გადაადგილდა და მეჩეჩზე დაჯდა.

რეგიონის საზღვაო სფეროს წყაროების ინფორმაციით, ტანკერზე აფეთქება მოხდა. გემზე თავდასხმის შესახებ ინფორმაცია არ გავრცელებულა და არც ერთ მხარეს პასუხისმგებლობა არ აუღია.

OSINT-პროექტი Russian Forces Spotter-ის ვარაუდით, ტანკერი შესაძლოა საზღვაო ნაღმზე აფეთქებულიყო.