ირანის საგარეო საქმეთა მინისტრმა აბას არაღჩიმ უკრაინის პრეზიდენტი ვოლოდიმირ ზელენსკი ირანულ სავაჭრო ხომალდზე თავდასხმაში დაადანაშაულა, რომლის შედეგადაც ერთი მეზღვაური დაიღუპა, და განაცხადა, რომ მსგავსი ქმედება „უპასუხოდ ვერ დარჩება“.
„ზელენსკი ირანის კომერციულ ხომალდს დაესხა თავს, რის შედეგადაც ერთი მეზღვაური დაიღუპა. ეს არის გაერო-ს წესდების აშკარა დარღვევა, რომელიც, ისრაელის კარნახით, ევროპის ამ ომში ჩათრევას ისახავს მიზნად.
ევროკავშირის უმაღლეს წარმომადგენელ კაია კალასთან და რუსეთის საგარეო საქმეთა მინისტრ სერგეი ლავროვთან სატელეფონო საუბრებისას ნათლად განვაცხადე, რომ კიევში მყოფი მუქთახორას მიერ ჩადენილი ეს ქმედება უპასუხოდ არ დარჩება,“ - წერს არაღჩი.
უკრაინამ შაბათს განაცხადა, რომ კასპიის ზღვაში იმ გემებს დაარტყა, რომლებსაც ირანიდან რუსეთში სამხედრო ტვირთს გადაჰქონდათ. ირანული მხარის ინფორმაციით, თავდასხმის შედეგად გემზე მყოფი ეკიპაჟის სამი წევრი დაშავდა და ერთი მეზღვაური დაიღუპა.
